Mumbai News : 2027 पर्यंत पश्चिम रेल्वेचा चेहरामोहरा बदलेल…. लवकरच सुरू होणार 200 नव्या लोकल फेऱ्या

Mumbai News:- मुंबईतील वाढती लोकसंख्या आणि त्यानुसार वाढणारी लोकल रेल्वेची गर्दी लक्षात घेता, पश्चिम रेल्वे मार्गावर लवकरच नव्या मार्गिकेचे काम सुरू आहे. मुंबईत दररोज लाखो प्रवासी विविध कारणांनी प्रवास करतात, ज्यामुळे लोकल रेल्वे हा सर्वाधिक वापरला जाणारा आणि सोयीचा प्रवासाचा पर्याय ठरतो. मात्र, वाढत्या गर्दीमुळे प्रवाशांना प्रचंड गैरसोयीचा सामना करावा लागत आहे. यावर उपाय म्हणून मुंबई रेल्वे विकास महामंडळ (MRVC) विरार ते डहाणू या दरम्यान चौपदरीकरण प्रकल्पावर काम करत आहे. या नव्या मार्गिकेमुळे मुंबईतील लोकल सेवा मोठ्या प्रमाणावर वाढणार असून प्रवाशांना दिलासा मिळणार आहे.

विरार-डहाणू चौपदरीकरण प्रकल्प सुमारे ३५ टक्के पूर्ण

विरार-डहाणू चौपदरीकरण प्रकल्प सुमारे ३५ टक्के पूर्ण झाला असून तो २०२७ पर्यंत पूर्ण करण्याचे लक्ष्य ठेवण्यात आले आहे. या प्रकल्पामुळे लोकल रेल्वेच्या २०० हून अधिक फेऱ्या वाढणार असल्याची माहिती अधिकाऱ्यांनी दिली आहे. मुंबई अर्बन ट्रान्सपोर्ट प्रोजेक्ट-३ (MUTP-3) अंतर्गत हा ६४ किलोमीटर लांबीचा प्रकल्प हाती घेण्यात आला असून त्यासाठी ३,५७८ कोटी रुपये मंजूर करण्यात आले आहेत.

या प्रकल्पात नव्या तिसऱ्या आणि चौथ्या मार्गिकेचे बांधकाम सुरू आहे. सध्या पश्चिम रेल्वेच्या विरार आणि डहाणू रोड या दुहेरी मार्गावर उपनगरीय गाड्या, मालवाहतूक आणि एक्स्प्रेस गाड्यांची मोठ्या प्रमाणात वर्दळ आहे. त्यामुळे या मार्गावरील सेवा वाढवणे कठीण झाले आहे. चौपदरीकरणामुळे हा ताण कमी होईल आणि अधिक गाड्या चालवता येतील.

या नव्या मार्गिकांमुळे चर्चगेट ते डहाणू आणि विरार ते डहाणू दरम्यान रेल्वे सेवा वाढवणे शक्य होणार आहे. सध्या या मार्गावर दिवसभरात केवळ ६ ते ७ थेट गाड्या धावतात. चौपदरीकरण पूर्ण झाल्यानंतर या मार्गावर २०० हून अधिक सेवा सुरू करता येतील. सध्या विरार, वैतरणा, सफाळे, केळवे रोड, डहाणू रोड आणि उमरोली या स्थानकांवर इमारती आणि पूल बांधण्याचे काम वेगाने सुरू आहे. यामुळे भविष्यात अधिक सेवा उपलब्ध होऊन प्रवाशांची गैरसोय कमी होईल.

गर्दी कमी करण्यासाठी उपयुक्त प्रकल्प

विरार-डहाणू रोड चौपदरीकरण हा मुंबईतील उपनगरीय आणि मुख्य रेल्वे नेटवर्कवरील गर्दी कमी करण्यासाठी अत्यंत महत्त्वाचा प्रकल्प आहे. या प्रकल्पासाठी आवश्यक असलेल्या २९.१७ हेक्टर खासगी आणि १०.२६ हेक्टर सरकारी तसेच २९.१७ हेक्टर वनजमिनीचे भूसंपादन पूर्ण झाले आहे. या मार्गावर एकूण १६ मोठे पूल बांधण्यात येणार असून त्यापैकी ४ पूल पूर्ण झाले आहेत, तर ४० लहान पूल पूर्णत्वास आले आहेत. याशिवाय या मार्गावर ४ अंडर पूल आणि १ रेल्वे ओव्हर पूल बांधण्यात येणार आहे.

हा प्रकल्प पूर्ण झाल्यावर मुंबईतील पश्चिम उपनगरीय रेल्वे मार्गावरील गर्दीचा ताण मोठ्या प्रमाणावर कमी होईल आणि प्रवाशांना अधिक सोयीसुविधा मिळतील. यामुळे प्रवासाचा वेळ कमी होऊन वाहतुकीची क्षमता वाढेल, ज्याचा थेट फायदा रोजच्या प्रवाशांना मिळणार आहे