Varas Nond: फक्त 25 रुपयात सातबारा उताऱ्यावर तुमचे नाव! 18 दिवसात वारस नोंदणी कशी करावी? जाणून घ्या संपूर्ण अर्ज प्रक्रिया

Online Varas Nond:- महाराष्ट्र सरकारने वारस नोंदणी आणि सातबारा उताऱ्यावर नाव चढवण्याची किंवा काढण्याची प्रक्रिया अधिक सोपी आणि पारदर्शक करण्यासाठी नवीन प्रणाली लागू केली आहे. याअंतर्गत नागरिकांना तलाठी कार्यालयात वारंवार चकरा मारण्याची गरज नाही, कारण ही संपूर्ण प्रक्रिया आता ऑनलाइन उपलब्ध आहे. सरकारने ई-हक्क प्रणाली सुरु केली असून, याद्वारे नागरिक फक्त २५ रुपयांमध्ये घरबसल्या वारस नोंदणीसाठी अर्ज करू शकतात. यामुळे वेळ वाचण्याबरोबरच भ्रष्टाचारालाही आळा बसणार आहे.

वारस नोंद म्हणजे काय?

वारस नोंद म्हणजे काय, याबाबत माहिती घेणे महत्त्वाचे आहे. जेव्हा एखाद्या व्यक्तीचा मृत्यू होतो आणि त्याच्या नावावर मालकीची शेतजमीन किंवा इतर स्थावर मालमत्ता असते, तेव्हा ती मालमत्ता त्याच्या कायदेशीर वारसांना मिळण्यासाठी अधिकृत नोंदणी करावी लागते. मृत व्यक्तीच्या पत्नी/पती, मुलगा किंवा मुलगी आणि आई यांना वारस म्हणून ही मालमत्ता हस्तांतरित करता येते. परंतु यासाठी मृत्यूनंतर तीन महिन्यांच्या आत वारस नोंदणीसाठी अर्ज करणे बंधनकारक आहे. ही प्रक्रिया पूर्ण झाल्यानंतरच संबंधित वारसांचे नाव सातबारा उताऱ्यावर नोंदवले जाते.

वारस नोंदीची ऑनलाईन प्रक्रिया

यापूर्वी वारस नोंदणीसाठी अर्ज करण्यासाठी तलाठी कार्यालयात जावे लागत असे, मात्र आता महाराष्ट्र सरकारच्या महसूल विभागाने ही प्रक्रिया ऑनलाइन उपलब्ध केली आहे. यासाठी ई-हक्क प्रणालीच्या संकेतस्थळावर (https://mahabhulekh.maharashtra.gov.in) भेट देऊन नोंदणी करावी लागते.

एकदा पोर्टलवर खाते उघडल्यावर अर्जदाराला वारस नोंदणीसाठी फॉर्म भरावा लागतो आणि त्यासोबत आवश्यक कागदपत्रे अपलोड करावी लागतात. अर्ज सादर केल्यानंतर १८ दिवसांत अर्जाची तपासणी केली जाते आणि आवश्यक कागदपत्रे योग्य असल्यास सातबारावर वारसाची नोंद केली जाते.

वारस नोंदीसाठी आवश्यक कागदपत्रे

वारस नोंदीसाठी आवश्यक कागदपत्रांमध्ये मृत व्यक्तीचे मृत्यू प्रमाणपत्र, अर्जदाराचे आधार कार्ड किंवा रेशन कार्ड, पत्त्याचा पुरावा, अर्जदाराच्या ओळखीचे अधिकृत कागदपत्र, उत्तराधिकार प्रमाणपत्र (लागल्यास), वारसांचे प्रतिज्ञापत्र आणि अर्जदाराचा पासपोर्ट आकाराचा फोटो यांचा समावेश होतो. जर मृत व्यक्ती सरकारी सेवेत कार्यरत असेल, तर सेवा नियमावली आणि सक्षम अधिकाऱ्याचे पत्रदेखील आवश्यक असते.

वारस नोंदणी पूर्ण झाल्यानंतर सातबारा उताऱ्यावर नाव चढवता येते. जर मृत व्यक्तीचे नाव सातबारावरून काढायचे असेल, तर त्यासाठी स्वतंत्र अर्ज भरावा लागतो. तसेच, सातबारावर बोजा चढवणे किंवा कमी करणे, विश्वस्तांचे नाव बदलणे, जमिनीच्या सातबारातील चूक दुरुस्त करणे अशा प्रकारच्या इतर सेवा देखील ई-हक्क प्रणालीद्वारे ऑनलाइन उपलब्ध आहेत.

महाराष्ट्र सरकारने महसूल विभागाच्या माध्यमातून सुरू केलेल्या या नवीन सुविधेमुळे नागरिकांना मोठा दिलासा मिळाला आहे. यामुळे पारंपरिक प्रक्रियेपेक्षा वेळ आणि पैशांची बचत होते. फक्त २५ रुपयांमध्ये ऑनलाइन अर्ज करण्याची सुविधा मिळाल्याने ही प्रक्रिया अधिक सुलभ आणि पारदर्शक झाली आहे. तसेच, सर्व अर्जांची ऑनलाईन नोंद असल्याने अनावश्यक दिरंगाई आणि भ्रष्टाचारालाही आळा बसणार आहे. त्यामुळे नागरिकांनी या प्रणालीचा अधिकाधिक लाभ घ्यावा आणि वारस नोंदणी किंवा सातबारावरील नाव चढवणे-काढण्याची प्रक्रिया सोयीस्कर पद्धतीने पूर्ण करावी.