Cutting Technology: शेतीत नवीन तंत्रज्ञान अवलंबा! 2जी आणि 3जी कटिंग तंत्राने लाखोत नफा कमवा

Farming Technology:- शेतीमध्ये सतत नवीन तंत्रांचा समावेश होत असून, त्यांचा योग्य प्रकारे अवलंब केल्यास उत्पादन वाढतेच.पण त्यासोबतच पिकाची गुणवत्ता देखील सुधारते. शेतीत वापरल्या जाणाऱ्या अशाच एका महत्त्वाच्या पद्धतीपैकी ‘2जी’ आणि ‘3जी’ कटिंग ही तंत्रे भोपळ्याच्या लागवडीत क्रांतिकारी बदल घडवत आहेत. या तंत्रांच्या मदतीने फळधारणेचा वेग आणि प्रमाण दोन्ही वाढवता येते, तसेच फळांचा आकार, चव आणि टिकवणक्षमता सुधारली जाते. हे तंत्र केवळ आधुनिक शेतीसाठी उपयुक्त नाही, तर पारंपरिक पद्धतीने शेती करणाऱ्या शेतकऱ्यांसाठीही सोपे आणि परिणामकारक आहे.

2जी आणि 3जी कटिंग म्हणजे काय?

भोपळ्याच्या वेलीला मुख्य खोड आणि त्यावर विविध फांद्या फुटलेल्या असतात. या शाखांमध्ये वाढीच्या विविध टप्प्यांना ‘G’ (जनरेशन – पिढी) क्रमांक दिले जातात. मुख्य खोडातून निघणाऱ्या पहिल्या फांद्यांना ‘1G’ म्हणजेच पहिली पिढी म्हटले जाते. जेव्हा या शाखांवरून नवीन फांद्या फुटतात, त्यांना ‘2G’ किंवा दुसरी पिढी म्हणतात. याच 2G शाखांवरून आणखी नवीन फांद्या फुटतात, त्यांना ‘3G’ म्हणजेच तिसरी पिढी म्हणतात. 3G शाखा म्हणजे फळधारणेसाठी सर्वाधिक उपयुक्त फांद्या असतात, कारण त्यावरच फुले आणि फळे जास्त प्रमाणात येतात. त्यामुळे योग्य प्रकारे 2जी आणि 3जी कटिंग केल्यास झाडाची वाढ नियंत्रित राहते आणि उत्पादन क्षमतेत मोठी वाढ होते.

2जी आणि 3जी कटिंगचे महत्त्व आणि फायदे

शेतीत फळधारणेच्या प्रमाणात वाढ करण्यासाठी योग्य व्यवस्थापन गरजेचे असते. 2जी आणि 3जी कटिंगमुळे झाडाची उर्जा फक्त वाढीसाठी न वापरता ती फळधारणेसाठी अधिक उपयुक्त होते. 2जी कटिंगमध्ये, जेव्हा मुख्य खोडातून वाढणाऱ्या 1G शाखांची छाटणी केली जाते, तेव्हा झाडाची वाढ 2G शाखांकडे वळवली जाते. यामुळे नवीन आणि अधिक फांद्या विकसित होतात, ज्यामुळे झाडाचा विस्तार वाढतो. त्याचप्रमाणे, 2जी शाखांची छाटणी केल्यास 3जी शाखांची वाढ होते आणि याच शाखांवर फळधारणा मोठ्या प्रमाणात होते. परिणामी, झाडाच्या उत्पादनक्षम भागात मोठी वाढ होते आणि फळांचे प्रमाण तसेच गुणवत्ता सुधारते.

हे तंत्र का वापरावे आणि त्याचे परिणाम काय आहेत?

हे तंत्र वापरण्याचे मुख्य उद्दीष्ट म्हणजे उत्पादन वाढवणे आणि फळांची गुणवत्ता सुधारणे. योग्य प्रकारे 2जी आणि 3जी कटिंग केल्यास झाडावर येणाऱ्या फळांची संख्या वाढते, तसेच ती अधिक मोठी आणि मधुर चवीची होतात. झाड व्यवस्थित वाढत असल्याने त्यावर येणाऱ्या रोगांचा आणि कीटकांचा प्रादुर्भाव तुलनेने कमी होतो. तसेच, झाडाची एकूण रचना नियंत्रित असल्याने त्याची निगा राखणे सोपे जाते.

अधिक उत्पादनामुळे शेतकऱ्यांना चांगला नफा मिळतो आणि फळांची गुणवत्ता सुधारल्यामुळे त्यांना बाजारात चांगला दर मिळतो. त्यामुळे ही तंत्रे कमी खर्चात अधिक नफा मिळवून देणारी ठरतात. याशिवाय, या तंत्राने झाडांचे व्यवस्थापन सोपे होते, कारण झाडाची वाढ नियंत्रित राहते आणि त्याची देखभाल तुलनेने सहज होते.

2जी आणि 3जी कटिंग कधी आणि कसे करावे?

भोपळ्याच्या वेलीला 30 ते 35 दिवस पूर्ण झाल्यावर या पद्धतीने छाटणी करण्याचा योग्य काळ असतो. सुरुवातीला 1G शाखा ओळखून त्यांची छाटणी केली जाते, जेणेकरून 2G शाखा अधिक प्रमाणात विकसित होतील. 2G शाखा मोठ्या झाल्यावर त्यांची छाटणी करून 3G शाखांना चालना दिली जाते. छाटणीसाठी स्वच्छ आणि धारदार उपकरणे वापरणे महत्त्वाचे असते, कारण त्यामुळे झाडाला संसर्गाचा धोका कमी होतो. योग्य प्रकारे छाटणी केल्यास झाडाची वाढ सुलभ होते आणि उत्पादन क्षमताही वाढते.

शेतकऱ्यांसाठी फायदेशीर ठरणारे 2जी आणि 3जी कटिंग तंत्रज्ञान

या तंत्रामुळे शेतकऱ्यांना मोठ्या प्रमाणात फायदा होतो. उत्पादन वाढल्याने बाजारात अधिक नफा मिळतो.तर झाडाची वाढ व्यवस्थापन करण्यास सोपी असल्यामुळे मेहनत आणि खर्च देखील कमी होतो. कमी जागेत अधिक उत्पादन घेण्याच्या दृष्टीने हे तंत्र उपयुक्त ठरते. याशिवाय, मोठ्या आकाराची आणि उत्तम चवीची फळे बाजारात जास्त मागणी असतात, त्यामुळे शेतकऱ्यांना चांगला दर मिळतो.

2जी आणि 3जी कटिंग तंत्रज्ञान हे भोपळ्याच्या लागवडीसाठी एक अत्यंत फायदेशीर आणि प्रभावी तंत्र आहे. याच्या मदतीने शेतकरी कमी खर्चात अधिक उत्पादन घेऊ शकतात आणि त्यांचे उत्पन्न वाढवू शकतात. योग्य वेळी आणि योग्य प्रकारे छाटणी केल्यास फळांचा दर्जा सुधारतो आणि त्यासोबतच बाजारात त्यांना अधिक मागणी आणि चांगला दर मिळतो. त्यामुळे शेतकऱ्यांनी या आधुनिक तंत्राचा अवलंब करून आपली शेती अधिक फायदेशीर बनवावी