चुकीच्या खात्यात UPI पेमेंट झाले? काळजी नको, ‘ही’ सोपी ट्रिक तुम्हाला मिळवून देईल पैसे परत

UPI Transaction:- UPI पेमेंट आजच्या काळात आर्थिक व्यवहारासाठी सर्वाधिक वापरले जाणारे साधन बनले आहे. मात्र, अनेकदा घाईगडबडीत चुकीचा क्रमांक टाकल्याने किंवा अपुऱ्या माहितीमुळे पैसे चुकून दुसऱ्या खात्यात ट्रान्सफर होण्याच्या घटना घडतात. अशा वेळी घाबरण्याचे कारण नाही, कारण रिझर्व्ह बँक ऑफ इंडिया (RBI) आणि नॅशनल क्राइम इन्व्हेस्टिगेशन ब्युरो (NCIB) यांनी अशा प्रकारच्या चुका सुधारण्यासाठी आणि पैसे परत मिळवण्यासाठी काही महत्त्वाच्या मार्गदर्शक सूचना दिल्या आहेत.

सर्वप्रथम या टोल फ्री नंबरवर संपर्क करा

जर तुमच्याही बाबतीत असा प्रकार घडला असेल, तर सर्वप्रथम तुम्ही त्वरित टोल-फ्री क्रमांक 18001201740 वर कॉल करून तक्रार नोंदवावी. कॉल करताना व्यवहाराचा तपशील, ट्रान्झॅक्शन आयडी, वेळ, रक्कम आणि संबंधित अकाउंट नंबर यांची माहिती अचूक द्यावी. दिलेली माहिती योग्य असल्यास ४८ तासांच्या आत तुमच्या खात्यात पैसे परत केले जातील.

संबंधित बँकेच्या कस्टमर केअरला फोन करावा

याशिवाय, संबंधित बँकेच्या कस्टमर केअरला संपर्क करूनही तक्रार नोंदवता येते. अनेक वेळा बँकेचे प्रतिनिधी फोनवर माहिती घेतात आणि अधिकृत तक्रार नोंदवण्यास सांगतात. अशा वेळी व्यवहाराचा संपूर्ण तपशील, जसे की पेमेंटची तारीख, वेळ, चुकलेल्या खात्याचा क्रमांक आणि रक्कम यांची नोंद ठेवा. व्यवहाराची स्क्रीनशॉट आणि UPI ट्रान्झॅक्शन ID सुरक्षित ठेवल्यास तक्रार सोडवणे अधिक सोपे होते.

थेट बँकेच्या शाखेत जाऊन कारवाई

जर फोनवर तक्रार नोंदवूनही पैसे परत मिळाले नाहीत, तर ग्राहकाने थेट बँकेच्या शाखेत जाऊन योग्य ती कारवाई करावी. बँकेमध्ये तक्रार अर्ज भरताना चुकीच्या पेमेंटबाबत सर्व पुरावे सादर करणे आवश्यक असते. यात चुकीच्या ट्रान्झॅक्शनचा पुरावा, व्यवहाराचा संदर्भ क्रमांक, संबंधित खात्याचा तपशील, आणि पेमेंट केल्याची तारीख यांचा समावेश असतो. काही वेळा बँक लवकर प्रतिसाद देत नाही किंवा परतावा देण्यास टाळाटाळ करते.

आरबीआयकडे तक्रार करण्याचा मार्ग

अशा वेळी ग्राहकांनी RBI च्या बँकिंग लोकपाल सेवा (Banking Ombudsman) द्वारे अधिकृत तक्रार दाखल करावी. यासाठी bankingombudsman.rbi.org.in या अधिकृत वेबसाइटला भेट देऊन बँकेच्या विरोधात ऑनलाइन तक्रार करता येते. RBI च्या नियमानुसार, बँकेने ४८ तासांच्या आत परतावा देणे आवश्यक आहे, अन्यथा ग्राहक तक्रार करण्याचा हक्क राखून ठेवतो.

अशा व्यवहारांपासून कसे वाचावे?

अशा घटनांपासून स्वतःचे संरक्षण करण्यासाठी काही महत्त्वाच्या गोष्टी पाळणे गरजेचे आहे. UPI व्यवहार करण्यापूर्वी संबंधित व्यक्तीचा क्रमांक आणि बँक तपशील नीट तपासा. विश्वासू व्यक्तींनाच पैसे ट्रान्सफर करा आणि मोठ्या रकमांचे व्यवहार करताना दोनदा खात्री करूनच पेमेंट करा. अज्ञात नंबर किंवा संशयास्पद मेसेजद्वारे आलेल्या पेमेंट रिक्वेस्टला प्रतिसाद देऊ नका. जर चुकून चुकीच्या खात्यात पैसे गेले, तर त्वरित वरील स्टेप्स फॉलो करा आणि योग्य कारवाईद्वारे तुमचे पैसे सुरक्षितपणे परत मिळवा.