Tourist Place: उन्हाळ्यात धबधबा, तलाव आणि थंड वाऱ्याची मजा! उन्हाळ्यात ‘या’ ठिकाणी फिरायलाच पाहिजे… पुण्याजवळील गुप्त नंदनवन उघड

Tourism In Summer:- उन्हाळ्याची चाहूल लागताच अनेकजण सुट्टीसाठी गारवा आणि निसर्गाच्या सान्निध्यात वेळ घालवण्याचा विचार करतात. मुंबई आणि पुणे या दोन्ही महानगरांच्या जवळ अनेक पर्यटनस्थळे आहेत, पण काही ठिकाणे अजूनही तितकीशी प्रसिद्ध नाहीत. त्यापैकीच एक म्हणजे एकोल व्हॅली, जिथे तुम्हाला निसर्गाचा अद्भुत अनुभव घेता येईल.

ही व्हॅली पुण्यापासून अवघ्या ८० किमी, तर मुंबईपासून १०० किमी अंतरावर आहे. निसर्गप्रेमी, साहसप्रेमी आणि ट्रेकिंगच्या शौकिनांसाठी हे ठिकाण परिपूर्ण आहे. सध्या या ठिकाणाचा एक व्हिडीओ सोशल मीडियावर मोठ्या प्रमाणावर व्हायरल होत आहे, ज्यात एका तरुणीने या जागेची खासियत स्पष्ट केली आहे.

व्हिडीओमध्ये काय दिसतंय?

या व्हायरल व्हिडीओमध्ये दिसणाऱ्या निसर्गसौंदर्याने कोणालाही भुरळ पाडावी. व्हिडीओ पाहिल्यावर पहिल्यांदा तुम्हाला हिरवाईने नटलेली संपूर्ण एकोल व्हॅली दिसेल. पुढे मोठ्या तलावासारखा निळसर पाण्याचा भाग दिसतो, ज्याच्या काठावर काही पर्यटक फिरताना दिसतात.

सगळ्यात जास्त लक्ष वेधून घेतो तो भोरंबी धबधबा, ज्याला लोटस वॉटरफॉल असेही म्हणतात. हा धबधबा तीन टप्प्यांत कोसळतो आणि निसर्गाच्या गूढ सौंदर्याची जाणीव करून देतो. काही पर्यटक या तलावात पोहतानाही दिसतात, तर काही जण मॅगी बनवताना, पाणी खेळताना आणि ट्रेकचा आनंद घेताना पाहायला मिळतात.

एकोल व्हॅली आणि भोरंबी धबधब्याचा ट्रेक

हे ठिकाण ट्रेकिंगसाठी प्रसिद्ध असून, भोरंबी धबधब्यापर्यंत जाण्यासाठी खडकाळ नदीच्या पात्रातून साहसी प्रवास करावा लागतो. हा ट्रेक काहीसा आव्हानात्मक असला तरीही, निसर्गाच्या सान्निध्यात चालण्याचा आनंद काही वेगळाच असतो.

ट्रेक करताना तुम्हाला मोठ्या तलावाचे चित्तथरारक दृश्य दिसेल. त्यातूनच हा धबधबा तीन टप्प्यांत व्हॅलीमध्ये कोसळताना दिसतो. हा प्रवास रोमांचक आणि साहसी तर आहेच, पण त्याचसोबत निसर्गाची गूढता आणि त्याचं सौंदर्य यामुळे तो अविस्मरणीय ठरतो.

सुरक्षिततेसाठी महत्त्वाच्या सूचना

हे ठिकाण जरी सुंदर असलं तरीही, येथे काही सावधगिरी बाळगणे आवश्यक आहे.पोहता येत नसल्यास लाईफ जॅकेटशिवाय तलावात जाऊ नका.धबधब्याच्या खाली खोल पाणी असल्याने अनुभवी पोहणाऱ्यांनीही सतर्क राहणे गरजेचे आहे.पाण्याचा प्रवाह जोरात असतो, त्यामुळे अचानक वाढणाऱ्या प्रवाहामुळे अडचण निर्माण होऊ शकते.या ठिकाणी ट्रेक करताना स्लीपर किंवा नॉन-ग्रिप शूज न घालता ट्रेकिंग बूट वापरा, जेणेकरून तुम्हाला घसरण्याचा धोका कमी होईल.येथे जाण्यापूर्वी स्थानिक गाईड किंवा ट्रेकिंग ग्रुपसोबत जाण्याचा विचार करा, जेणेकरून तुमच्या प्रवासात अडथळे येणार नाहीत.

कधी आणि कसं जावं?

या ठिकाणी जाण्यासाठी उन्हाळा आणि पावसाळा हे दोन्ही हंगाम उत्तम आहेत. उन्हाळ्यात येथे थंडगार वातावरणाचा अनुभव घेता येतो, तर पावसाळ्यात धबधब्याचे सौंदर्य अजूनच खुलते.

पुण्याहून जाता येईल

कार किंवा बाईकने NH-48 महामार्गावरून लोणावळा मार्गे जाता येते.रेल्वेने लोणावळा स्थानकावर उतरून तिथून स्थानिक वाहनाने जाता येते.

मुंबईहून जाता येईल

कारने मुंबई-पुणे एक्सप्रेसवेवरून थेट लोणावळा गाठावे, आणि तिथून पुढे एकोल व्हॅलीसाठी स्थानिक वाहतूक उपलब्ध आहे.
रेल्वेने लोणावळा किंवा खंडाळा स्थानक गाठून पुढे जाऊ शकता.

का भेट द्यावी?

जर तुम्ही गर्दीपासून दूर निसर्गाच्या कुशीत शांत वेळ घालवायचा विचार करत असाल, तर एकोल व्हॅली आणि भोरंबी धबधबा तुमच्यासाठी एक उत्तम पर्याय ठरू शकतो.याठिकाणचे थंड आणि निसर्गरम्य वातावरण, साहसी ट्रेकिंगचा आनंद,धबधब्याखाली पोहण्याचा थरारक अनुभव तसेच मुंबई आणि पुण्याच्या अगदी जवळ व गर्दीपासून दूर असलेले निसर्गरम्य ठिकाण त्यामुळे उन्हाळ्यात भेट देण्यासाठी उत्तम पर्यटन स्थळ आहे.