Solar Energy : सौरऊर्जा ग्राहकांसाठी धक्कादायक बातमी ! महावितरणचा नवा नियम ग्राहकांसाठी धोकादायक ?

Solar Energy : प्रधानमंत्री सूर्यघर मोफत वीज योजनेत सहभागी ग्राहकांना संध्याकाळी ६ ते सकाळी ९ या कालावधीत वीज बिल आकारण्याच्या महावितरणच्या प्रस्तावामुळे मोठी चिंता व्यक्त केली जात आहे. या बदलामुळे नवीन ग्राहक योजनेपासून दूर राहतील आणि परिणामी संपूर्ण योजना अपयशी ठरण्याची शक्यता आहे, अशी भीती महाराष्ट्र सोलर मॅन्युफॅक्चरर्स असोसिएशनने व्यक्त केली आहे.

ग्राहकांमध्ये नाराजी

महावितरणच्या प्रस्तावानुसार, सौरऊर्जा योजनेत सहभागी ग्राहकांना रात्रीच्या वेळेस वीज वापरल्यास त्याचे शुल्क द्यावे लागेल. यामुळे सौरऊर्जा योजनेसाठी गुंतवणूक केलेल्या ग्राहकांना त्यांच्या आर्थिक गणितावर परिणाम होईल. सध्या या ग्राहकांना शून्य वीज बिल मिळत असले तरी, नवीन धोरणामुळे रात्रीच्या वीज खरेदीसाठी त्यांना भरपाई करावी लागेल.

वीज बिलाचा अतिरिक्त भार

राज्यातील सौरऊर्जा प्रकल्पांना मोठ्या प्रमाणावर प्रोत्साहन देण्यात आले होते. सौरऊर्जा पॅनेल बसवण्यासाठी डीलर्सना उद्दिष्टे दिली गेली आणि ग्राहकांना बँकांकडून कर्ज मिळवून देण्यात आले. त्यामुळे सध्या राज्यातील १ लाखाहून अधिक घरांमध्ये सौरऊर्जा प्रणाली कार्यरत आहे. परंतु, नव्या धोरणामुळे या घरांतील ग्राहकांना आता वीज बिलाचा अतिरिक्त भार सहन करावा लागेल.

सौरउद्योगावर मोठा परिणाम

सोलर मॅन्युफॅक्चरर्स असोसिएशनने महावितरणच्या या निर्णयाविरोधात मुख्यमंत्री देवेंद्र फडणवीस यांना निवेदन दिले आहे. ग्राहकांवरील वीज बिलाचा भार टाळावा आणि आयोगाच्या सुनावणीत ठोस भूमिका घ्यावी, अशी मागणी संघटनेने केली आहे. योजनेत सहभागी झालेल्या ग्राहकांसह, ५ लाख नवीन ग्राहक सौरऊर्जा योजनेसाठी इच्छुक आहेत. मात्र, महावितरणचा हा नवीन नियम लागू झाल्यास ते योजनेत सहभागी होणार नाहीत आणि परिणामी सौरऊद्योगाला मोठी मंदी येईल. यामुळे सुमारे २.५ लाख लोक बेरोजगार होण्याची शक्यता आहे, अशी भीती व्यक्त केली जात आहे.

सोलर मॅन्युफॅक्चरर्स असोसिएशनचा इशारा

संघटनेच्या मते, हा प्रस्ताव लागू झाल्यास सौरऊर्जा योजनेतील सहभागी ग्राहकांनाही निर्णयाचा पश्चाताप होईल. यामुळे लोकांनी योजनेसाठी मोठ्या प्रमाणावर नोंदणी केली, मात्र आता जर त्यांच्यावर वीज बिलाचा अतिरिक्त भार आला, तर योजना अयशस्वी ठरेल. संघटनेने पुढील काही दिवसांत या धोरणाविरोधात जनजागृती करण्याचा निर्णय घेतला आहे, तसेच ग्राहकांनी संघटितपणे विरोध करावा, असे आवाहन करण्यात आले आहे.

सरकारकडून भूमिका स्पष्ट होणे आवश्यक

महावितरणच्या नव्या प्रस्तावामुळे ग्राहकांमध्ये अस्वस्थता वाढली आहे. सौरउद्योगाचा वेग मंदावण्याची आणि मोठ्या प्रमाणावर बेरोजगारी निर्माण होण्याची शक्यता आहे.
संबंधित यंत्रणांकडून या प्रस्तावावर लवकरच निर्णय अपेक्षित आहे.सौरऊर्जा क्षेत्राचा विकास आणि ग्राहकांच्या फायद्याचा विचार करता, महावितरणने हा प्रस्ताव मागे घ्यावा, अशी जोरदार मागणी करण्यात येत आहे. पुढील काही दिवसांत याबाबत सरकारची भूमिका स्पष्ट होणे आवश्यक ठरणार आहे.