Satbara Utara: दलालांचे दिवस गेले! शेतजमिनीच्या कागदपत्रांची नक्कल मिळणार एका क्लिकवर

Satbara Utara:- शेतजमिनीच्या कागदपत्रांसाठी तहसील कार्यालये आणि नगर भूमी अभिलेख विभागाच्या फेऱ्या मारण्याची गरज लवकरच संपणार आहे. राज्य सरकारने महसूल आणि नगर भूमी अभिलेख विभागाच्या १ कोटी ३९ लाख अभिलेखांचे डिजिटलायझेशन पूर्ण केले आहे, त्यामुळे नागरिकांना त्यांच्या जमिनीशी संबंधित सर्व कागदपत्रे ऑनलाइन मिळू शकणार आहेत.

यासाठी https://bhulekh.mahabhumi.gov.in/ ही अधिकृत वेबसाईट तयार करण्यात आली असून, याद्वारे कोणतीही कागदपत्रे थेट डाऊनलोड करता येणार आहेत. सध्या नागरिकांना या कागदपत्रांच्या प्रमाणित प्रतींसाठी कार्यालयात जावे लागते, मात्र भविष्यात ही आवश्यकता पूर्णतः संपणार आहे. शासनाने सर्व कागदपत्रांवर डिजिटल सही करण्याचे काम सुरू केले असून, हे काम पूर्ण झाल्यानंतर जमीन अभिलेख कार्यालये आणि तहसील रेकॉर्ड रूममधील नक्कल मिळवण्यासाठी लागणारा वेळ आणि गैरप्रकार पूर्णपणे थांबतील.

कागदपत्रांसाठी नागरिकांना करावा लागतो अडचणींचा सामना

सध्या शेतजमिनीशी संबंधित महत्त्वाची कागदपत्रे मिळवण्यासाठी नागरिकांना मोठ्या प्रमाणावर अडचणींचा सामना करावा लागतो. अनेक वेळा कार्यालयात हेलपाटे मारावे लागतात आणि अधिकारी-कर्मचाऱ्यांच्या मनमानीमुळे नागरिकांना उशीर होतो. काही ठिकाणी नक्कल मिळवण्यासाठी अनधिकृत पैसेही द्यावे लागतात. विशेषतः तहसील कार्यालयांमध्ये आणि नगर भूमी अभिलेख विभागात मोठ्या प्रमाणावर भ्रष्टाचार झाल्याच्या तक्रारी येत होत्या.

अनेक ठिकाणी एजंट किंवा दलाल तयार झाले होते, जे नागरिकांकडून अतिरिक्त पैसे उकळून कागदपत्रे मिळवून देत होते. या परिस्थितीला आळा घालण्यासाठी शासनाने डिजिटल प्रक्रिया सुरू केली असून, नागरिकांना घरी बसूनच त्यांना हवे असलेले दस्तऐवज मिळतील. जर कागदपत्रांवर अधिकृत सही आवश्यक असेल, तर सुरुवातीला कार्यालयात जावे लागेल, मात्र डिजिटल सही प्रक्रिया पूर्ण झाल्यानंतर ती गरजही संपेल.

नागरिकांना आता ऑनलाईन उपलब्ध होतील कागदपत्रे

या सुविधेमुळे नागरिकांना ऑनलाइन शुल्क भरून घरबसल्या आवश्यक कागदपत्रे मिळवता येतील, त्यामुळे संपूर्ण प्रक्रियेत अधिक पारदर्शकता आणि विश्वासार्हता निर्माण होईल. डिजिटल प्रक्रियेमुळे केवळ वेळ आणि पैशांची बचत होणार नाही, तर भ्रष्टाचारावरही आळा बसेल. यामुळे महसूल आणि भूमी अभिलेख कार्यालयांत होणारी गर्दीही कमी होईल, तसेच अधिकाऱ्यांवरील कामाचा ताणही कमी होणार आहे. ही सुविधा सुरू झाल्यानंतर टिप्पन बुक, गुणाकार बुक,

आकारफोड पत्रक, आकार प्रपत्र, कमी-जास्त पत्रक, आकार बंध, नऊ तीन नऊ चार, शेतपुस्तक, दुरुस्ती अभिलेख, एकत्रीकरण, जबाबदारी अभिलेख, ताबा पावत्या, चौरस नोंद वही, मिळकत पत्रिका, वसलेवार पुस्तक, जुने सातबारा, आठ अ, फेरफार, नकाशा, चालू सातबारा आठ अ, सिटी सर्व्हेतील मालमत्ता पत्रक आणि शेत व घरासंबंधी इतर सर्व महत्त्वाची कागदपत्रे एका क्लिकवर उपलब्ध होणार आहेत.

नागरिकांना जमिनीच्या कागदपत्रांसाठी मध्यस्थांची गरज नाही

ही नवीन प्रणाली सुरू झाल्यानंतर महसूल विभाग आणि नगर भूमी अभिलेख कार्यालयांची जुनी कार्यपद्धती बदलणार आहे. नागरिकांना त्यांच्या जमिनीच्या कागदपत्रांसाठी कोणत्याही मध्यस्थाची आवश्यकता लागणार नाही. ही सेवा ऑनलाइन उपलब्ध होत असल्याने त्याचा मोठा फायदा शेतकरी, जमीन खरेदीदार-विक्रीदार, बांधकाम व्यावसायिक आणि सर्वसामान्य नागरिकांना होईल. डिजिटल सही झाल्यानंतर ऑनलाईन कागदपत्रे थेट कोर्ट, बँक आणि इतर सरकारी कार्यालयांमध्ये ग्राह्य धरली जातील.

त्यामुळे संपूर्ण प्रक्रियेत वेग येईल आणि नागरिकांचा वेळ वाचेल. शासनाने या बदलाला अधिक वेग देण्यासाठी काम सुरू केले असून, लवकरच राज्यातील सर्व नागरिकांना ही सुविधा उपलब्ध होईल. यामुळे महसूल व जमिनीच्या व्यवहारांमध्ये मोठी क्रांती घडेल आणि जमिनीच्या कागदपत्रांसाठी होणारा त्रास कायमचा संपेल.