Satbara Utara: जिवंत सातबारा मोहीम म्हणजे काय? सातबारा उताऱ्यावर तुमचं नाव नाही? ही मोहीम तुमच्यासाठीच आहे कामाची..

Agriculture News:- बुलढाणा जिल्ह्यातील चिखली तालुक्यात तहसीलदारांनी यशस्वीपणे राबविलेल्या 'जिवंत सातबारा मोहीमे'ला जिल्हाधिकारी डॉ. किरण पाटील यांनी सकारात्मक प्रतिसाद दिला आहे. या मोहिमेच्या प्रभावी अंमलबजावणीनंतर, आता संपूर्ण बुलढाणा जिल्ह्यात याचा विस्तार करण्याचा निर्णय घेतला आहे. महसूल विभागाच्या 100 दिवस कृती कार्यक्रमांतर्गत, 1 मार्चपासून ही मोहीम सुरू होणार असून यासाठी अधिकृत परिपत्रकही जाहीर करण्यात आले आहे.

या मोहिमेचा उद्देश

या मोहिमेचा मुख्य उद्देश म्हणजे, सातबारा उताऱ्यावर मयत खातेदारांच्या वारसांची अधिकृत नोंदणी करणे. अनेक वेळा वारसांच्या नावांची नोंद वेळेवर होत नसल्यामुळे शेतजमिनीवरील हक्क मिळवण्यासाठी त्यांना मोठ्या अडचणींचा सामना करावा लागतो. त्यामुळे या मोहिमेच्या माध्यमातून वारसांना त्यांच्या शेतजमिनीशी संबंधित सर्व अधिकृत कागदपत्रे वेळेत आणि सुलभ पद्धतीने मिळावीत, हा या उपक्रमामागील महत्त्वाचा हेतू आहे.

वारस नोंदणी प्रक्रियेला अधिक सोपे आणि पारदर्शक करण्यासाठी 'ई-हक्क' प्रणालीचा वापर केला जाणार आहे. मोहिमेच्या यशस्वी अंमलबजावणीसाठी संबंधित तहसीलदारांना नोडल अधिकारी म्हणून जबाबदारी सोपवण्यात आली आहे. प्रशासनाने स्पष्ट निर्देश दिले आहेत की, ही संपूर्ण प्रक्रिया वेळेत पूर्ण करावी, जेणेकरून वारसांना कोणत्याही विलंबाशिवाय त्यांचा अधिकृत हक्क मिळू शकेल.

तीन टप्प्यात राबवली जाणार ही मोहीम

ही मोहीम तीन टप्प्यांमध्ये राबवली जाणार आहे. 1 ते 5 मार्च या कालावधीत ग्राम महसूल अधिकारी (तलाठी) त्यांच्या क्षेत्रातील मयत खातेदारांची यादी तयार करतील. त्यानंतर, 6 ते 15 मार्च दरम्यान, वारसांनी आवश्यक कागदपत्रे तलाठ्यांकडे जमा करायची आहेत. त्यानंतर, तलाठी आणि मंडळ अधिकारी स्थानिक चौकशी करून वारस ठराव मंजूर करतील. अखेर, 16 ते 31 मार्च या कालावधीत वारस फेरफार प्रक्रियेची अंतिम अंमलबजावणी केली जाईल आणि त्यास अधिकृत मंजुरी दिली जाईल.

जिल्हा प्रशासनाने सर्व संबंधित वारसांना वेळेत अर्ज करण्याचे आवाहन केले आहे. ही प्रक्रिया पूर्ण झाल्यानंतर शेतजमिनीच्या हक्कांसाठी आवश्यक असलेली कागदपत्रे मिळणे अधिक सुलभ होणार आहे. अर्ज करण्यासाठी काही महत्त्वाची कागदपत्रे आवश्यक असतील, जसे की खातेदाराचा मृत्यू दाखला, सर्व वारसांच्या जन्मतारखेचा पुरावा, आधारकार्डच्या साक्षांकित प्रती, वारस संबंधी शपथपत्र आणि स्वयंघोषणापत्र तसेच अर्जात नमूद केलेला पत्ता व संपर्क क्रमांक.

जिवंत सातबारा मोहिमेचे महत्त्व

'जिवंत सातबारा मोहीमे'चे महत्त्व यामुळे अधोरेखित होते की, सातबारा उताऱ्यावर वारसांच्या नोंदी वेळेवर अद्ययावत करण्यासाठी हा एक महत्त्वपूर्ण टप्पा आहे. अनेक वारसांना ही प्रक्रिया पार करताना मोठ्या अडचणींचा सामना करावा लागतो. त्यामुळे, या समस्येवर तोडगा काढण्यासाठी बुलढाणा जिल्ह्यात हा उपक्रम राबवला जात आहे. ही मोहीम वेळेत आणि प्रभावीपणे पूर्ण झाल्यास, भविष्यात शेतकऱ्यांसाठी आणि त्यांच्या वारसांसाठी शेतजमिनीशी संबंधित कायदेशीर प्रक्रिया अधिक सुलभ आणि पारदर्शक होईल.