Pune Flyover News: पुणे-शिरूर प्रवासाचा वेग वाढणार… आता फक्त 80 मिनिटात अंतर पूर्ण!

Pune Flyover News:- पुणे-शिरूर या ५४ किलोमीटर लांबीच्या सहापदरी उड्डाण पुलासाठी राज्य सरकारने ७ हजार ५१५ कोटी रुपयांची भरीव तरतूद अर्थसंकल्पात केली आहे. या प्रकल्पाला आता वेग येणार असून, त्यामुळे प्रवासी आणि नागरिकांमध्ये समाधानाचे वातावरण आहे. सध्या पुणे ते शिरूर हे अंतर दोन ते अडीच तासांमध्ये पार करावे लागते. मात्र, या उड्डाण पुलाचे काम पूर्ण झाल्यानंतर हे अंतर केवळ ८० मिनिटांत पार करता येणार आहे. हा प्रकल्प पूर्ण झाल्यानंतर वाहतूक कोंडीमुळे त्रस्त झालेल्या नागरिकांना मोठा दिलासा मिळणार आहे.

पुणे-अहिल्यानगर महामार्ग हा विदर्भ, मराठवाडा आणि मध्य महाराष्ट्राशी पुण्याला जोडणारा एक महत्त्वाचा दुवा आहे. या महामार्गावरून रोज सुमारे दीड लाखांहून अधिक वाहने ये-जा करतात. यामध्ये रांजणगाव औद्योगिक वसाहतीकडे जाणारी वाहने, अष्टविनायक दर्शनासाठी येणारे भाविक आणि पुणे शहराकडे प्रवास करणाऱ्या लोकांचा समावेश आहे.

मात्र, अपुरा महामार्ग आणि वाढती वाहनसंख्या यामुळे वाघोली, लोणीकंद, कोरेगाव भीमा, शिक्रापूर, सणसवाडी, रांजणगाव, सरदवाडी आणि शिरूर या भागांमध्ये सतत वाहतूक कोंडी निर्माण होते. या कोंडीमुळे प्रवाशांचा वेळ वाया जातो, औद्योगिक मालवाहतुकीला अडथळा निर्माण होतो आणि रुग्णवाहिकांनाही विलंब होतो. या समस्येवर तोडगा काढण्यासाठी सरकारने हा बहुमजली उड्डाण पुलाचा प्रकल्प हाती घेतला आहे.

कसे आहे या प्रकल्प उभारणीचे नियोजन?

हा प्रकल्प महाराष्ट्र राज्य पायाभूत सुविधा विकास महामंडळ (MSIDC) अंतर्गत 'डिझाइन, फायनान्स, बिल्ड, ऑपरेट अँड ट्रान्सफर' (DFBOT) या सार्वजनिक-खासगी भागीदारी मॉडेलद्वारे उभारला जाणार आहे. पुणे (खराडी चौक) ते शिरूरदरम्यान सहापदरी उन्नत मार्ग तयार करण्यात येणार आहे. या अत्याधुनिक उड्डाण पुलावर प्रवाशांसाठी पाच प्रमुख ठिकाणी – खराडी, लोणीकंद, शिक्रापूर, रांजणगाव आणि शिरूर – प्रवेश आणि निर्गमन व्यवस्था (एन्ट्री-एक्झिट पॉइंट) असणार आहे. यासाठी आवश्यक तेथे भूसंपादनही करण्यात येणार आहे.

हा उड्डाण पूल तीन स्तरांवर बांधला जाणार आहे. सर्वात वरच्या स्तरावर मेट्रोसेवा, मधल्या स्तरावर हलक्या चारचाकी वाहनांसाठी मार्ग आणि तळमजल्यावर अवजड वाहतुकीसाठी स्वतंत्र मार्ग असे नियोजन करण्यात आले आहे. यामुळे वाहतुकीचे व्यवस्थापन अधिक प्रभावी होईल आणि विविध प्रकारच्या वाहनांसाठी वेगवेगळे मार्ग उपलब्ध होतील. पुणे (खराडी चौक) ते वाघोली या भागात मेट्रो सुविधा उपलब्ध करून देण्याचे नियोजन आहे. त्यामुळे सध्या पुणे-शिरूर प्रवासासाठी लागणारा दोन ते अडीच तासांचा वेळ कमी होऊन हा प्रवास अवघ्या ८० मिनिटांत पूर्ण करता येणार आहे.

दुमजली उड्डाणपुलाची गरज का?

पुणे-शिरूर मार्गावर मोठ्या प्रमाणात नागरीकरण झाले आहे. महामार्गालगत अनेक गावांमध्ये नागरी वस्ती आणि उद्योगधंदे वाढले आहेत. यामुळे या मार्गाचे अधिक रुंदीकरण करणे शक्य नाही. अशा परिस्थितीत दुमजली उड्डाण पूल हा वाहतूक कोंडी सोडविण्याचा सर्वोत्तम पर्याय ठरत आहे.

शासनाचा उद्देश हा आहे की, या पुलाच्या माध्यमातून वाहनांची गती वाढेल आणि वाहतूक सुरळीत होईल. विशेषतः रांजणगाव औद्योगिक वसाहतीकडे जाणाऱ्या वाहनांना सुलभ आणि जलद मार्ग उपलब्ध होईल. तसेच, एसटी (राज्य परिवहन) आणि पीएमपी (पुणे महानगर परिवहन महामंडळ) यांच्या बसेससाठी स्वतंत्र थांबे तयार करण्यात येणार आहेत, ज्यामुळे सार्वजनिक वाहतुकीलाही गती मिळेल.

वाहतूक कोंडीला जबाबदार असलेल्या अनेक कारणांमध्ये प्रामुख्याने पुणे-वाघोली टप्प्यातील एक लाख 'पीसीयू ट्रॅफिक', औद्योगिक वसाहतींमुळे वाढलेली हलकी आणि अवजड वाहतूक, अनधिकृत रिक्षा आणि खासगी बसेसचे थांबे यांचा समावेश आहे. तसेच, वाहतूक नियमांचे उल्लंघन, विरुद्ध दिशेने येणाऱ्या वाहनांची संख्या, आणि रस्त्यालगतचे अतिक्रमण यामुळेही कोंडीचा प्रश्न गंभीर झाला आहे.

याशिवाय, पुणे-अहिल्यानगर महामार्गावर असलेले श्रीक्षेत्र रांजणगाव हे अष्टविनायकांपैकी एक महत्त्वाचे स्थान आहे. या ठिकाणी भाविकांची मोठी वर्दळ असते. सध्या वनाज ते रामवाडीपर्यंत सुरू असलेली मेट्रो सेवा शिरूरपर्यंत वाढवल्यास अष्टविनायक दर्शनासाठी येणाऱ्या भाविकांना मोठी सुविधा मिळेल.

याशिवाय, उद्योग, वैद्यकीय सेवा आणि नियमित कामासाठी प्रवास करणाऱ्या नागरिकांचा प्रवास सुकर होईल. यामुळे वाहतूक कोंडी टळेल आणि अपघातांचे प्रमाणही घटण्यास मदत होईल. विशेषतः रुग्णवाहिकांना वेळेत रुग्णालयात पोहोचता येईल, ज्यामुळे प्राणहानी टाळली जाईल.

हा बहुमजली उड्डाण पूल केवळ वाहतुकीचा प्रश्न सोडवणार नाही, तर पुणे आणि शिरूरदरम्यानच्या औद्योगिक आणि नागरी विकासाला गती देणार आहे. या प्रकल्पामुळे नागरिकांचा प्रवास अधिक सोयीस्कर होईल आणि पुणे शहराच्या पूर्व भागाचा सर्वांगीण विकास साधला जाईल.