महाराष्ट्राच्या विकासाला नवा वेग! 102 वर्षांपासून रखडलेला ‘हा’ Railway मार्ग होणार सुरू…. रेल्वे प्रकल्पाच्या दुनियेत मोठी घडामोड

Pandharpur-Phaltan Railway:- महाराष्ट्रात मोठ्या प्रमाणावर रेल्वे प्रकल्प सुरू असताना, एक ऐतिहासिक प्रकल्प तब्बल 102 वर्षांपासून रखडलेला आहे. पंढरपूर-फलटण रेल्वे मार्ग हा ब्रिटिश काळात, 1923 साली मंजूर करण्यात आला होता. मात्र, विविध कारणांमुळे या प्रकल्पाचे काम प्रत्यक्षात कधीच सुरू झाले नाही.

महाराष्ट्रात सध्या बुलेट ट्रेन आणि नवीन रेल्वे मार्गांसाठी वेगाने काम सुरू असताना, हा रेल्वे मार्ग रखडलेला असल्याने स्थानिक नागरिकांच्या अपेक्षा दिवसेंदिवस वाढत गेल्या होत्या. अखेर, आता या प्रकल्पासंदर्भात मोठी अपडेट समोर आली असून, पुढील 45 दिवसांत तो मार्गी लागण्याची शक्यता आहे. सध्या या प्रकल्पाच्या प्रत्यक्ष अंमलबजावणीसाठी महत्त्वाचे पाऊल उचलण्यात आले असून, या मार्गासाठी आवश्यक असलेल्या भूसंपादनाचा सर्वेक्षण अहवाल तयार करण्याचे काम सुरू झाले आहे.

1923 मध्ये करण्यात आले होते भूसंपादन

1923 मध्ये पंढरपूर आणि माळशिरस तालुक्यातील 18 गावांमध्ये या रेल्वे मार्गासाठी भूसंपादन करण्यात आले होते. मात्र, त्यानंतरच्या काळात हे काम विविध प्रशासकीय आणि वित्तीय अडचणींमुळे थांबले. आता महसूल विभागातील तलाठी, अभिलेख अधिकारी आणि रेल्वे विभागाच्या अधिकाऱ्यांनी संयुक्तरित्या या भूसंपादनाचा सर्वेक्षण अहवाल तयार करण्याची प्रक्रिया सुरू केली आहे.

हे सर्वेक्षण पूर्ण झाल्यानंतर पुढील 45 दिवसांत संपूर्ण अहवाल सोलापूर रेल्वे विभागाला सादर केला जाणार आहे. यामुळे 102 वर्षे रखडलेल्या या प्रकल्पाला अखेर प्रत्यक्ष सुरुवात होणार आहे.

पंढरपूर ते फलटण भागाच्या विकासासाठी महत्त्वपूर्ण

हा रेल्वे मार्ग कार्यान्वित झाल्यास पंढरपूर आणि फलटण भागाचा मोठ्या प्रमाणावर विकास होईल. पंढरपूर हे महाराष्ट्रातील महत्त्वाचे धार्मिक आणि सांस्कृतिक केंद्र असून, वार्षिक लाखो भाविक येथे दर्शनासाठी येतात. मात्र, या ठिकाणी रेल्वे मार्ग नसल्याने प्रवाशांना अनेक समस्यांना सामोरे जावे लागते. रेल्वे मार्ग सुरू झाल्यास पंढरपूरपर्यंत थेट रेल्वे वाहतूक सुरू होईल आणि त्यामुळे प्रवाशांना मोठा दिलासा मिळेल.

तसेच, या मार्गाच्या उभारणीमुळे स्थानिक व्यापारी आणि उद्योगधंद्यांनाही चालना मिळेल. फलटण आणि पंढरपूर भाग हा शेती आणि औद्योगिक दृष्टिकोनातून महत्त्वाचा असून, रेल्वे वाहतुकीच्या अभावामुळे येथील व्यापार मर्यादित राहिला आहे. नव्या रेल्वे मार्गामुळे या भागातील उद्योगांना बाजारपेठ उपलब्ध होईल, वाहतुकीचा वेळ आणि खर्च कमी होईल तसेच स्थानिक अर्थव्यवस्थेला चालना मिळेल. विशेषतः साखर कारखाने, कृषी प्रक्रिया उद्योग आणि विविध लघुउद्योग यांना या रेल्वे मार्गाचा मोठा फायदा होईल.

इतकी वर्षे रखडलेल्या या प्रकल्पाला अखेर गती मिळाल्याने स्थानिक नागरिकांमध्ये उत्साहाचे वातावरण आहे. प्रशासनानेही या प्रकल्पाला गती देण्याचा निर्धार केला असून, सर्वेक्षण पूर्ण झाल्यानंतर लवकरात लवकर काम सुरू करण्याच्या दृष्टीने नियोजन केले जात आहे. दीर्घ प्रतीक्षेनंतर अखेर या ऐतिहासिक रेल्वे मार्गाला वास्तवाचे रूप मिळणार असून, हा प्रकल्प महाराष्ट्राच्या प्रगतीमध्ये महत्त्वाची भूमिका बजावणार आहे.