Orange Farming: 5 लाख खर्च आणि 24 लाखांचा नफा! जाणून घ्या उद्धवराव राऊत यांचा संत्रा शेतीतील यशस्वी फार्मूला

Farmer Success Story:- उद्धवराव राऊत यांनी आपल्या जिद्द आणि आधुनिक शेती तंत्रज्ञानाच्या मदतीने संत्रा शेतीत एक नवा आदर्श निर्माण केला आहे. मंगरूळपीर तालुक्यातील वनोजा गावातील या मेहनती शेतकऱ्याने साडेतीन एकर क्षेत्रावर संत्रा लागवड करून तब्बल २९ लाख ६२ हजार ४०० रुपयांचे विक्रमी उत्पादन घेतले आहे. त्यांच्या या यशस्वी प्रयोगामुळे गावातील आणि संपूर्ण जिल्ह्यातील शेतकऱ्यांना नवीन मार्गदर्शन मिळाले आहे.

वनोजा परिसरातील जमिन आणि हवामान संत्रा लागवडीस अनुकूल असले तरीही, पाण्याच्या कमतरतेमुळे अनेक शेतकऱ्यांना अडचणींचा सामना करावा लागत होता. मात्र, उद्धवराव राऊत यांनी या अडचणींवर मात करत शेततळे खोदून ठिबक सिंचन प्रणालीचा वापर केला. यामुळे पाण्याचा काटेकोर आणि शास्त्रशुद्ध वापर होऊन संत्रा बाग फुलली. त्यांनी आपल्या शेतात १८×१८ या पद्धतीने ५३० संत्रा झाडांची लागवड केली, ज्यामुळे उत्पादनाचे प्रमाण अधिक वाढले.

वनोजा येथील संत्र्याला संपूर्ण देशातून मागणी

वनोजा येथील संत्र्याला महाराष्ट्रासह देशभरातून मोठी मागणी आहे. येथील संत्र्याची चव आणि गुणवत्ता उत्कृष्ट असल्याने व्यापारी वर्ग मोठ्या प्रमाणावर खरेदीसाठी पुढे येत आहे. यंदा संत्र्याला प्रति टन ४३ हजार रुपयांचा बाजारभाव मिळत आहे, मात्र राऊत यांनी आपल्या उत्पादनाचा विचार करून २४ किलोच्या एका कॅरेटसाठी ७०० रुपये दर निश्चित केला. त्यामुळे त्यांच्या बागेतील ५३० झाडांपैकी ४२५ झाडांनी चांगला बहर दिला आणि एकूण ४२३२ कॅरेट संत्र्यांचे उत्पादन झाले. यातून त्यांनी तब्बल २९ लाख ६२ हजार ४०० रुपयांचे उत्पन्न मिळवले.

या उत्पन्नातील ५ लाख रुपये खर्च वगळता, त्यांना २४ लाख ६२ हजार ४०० रुपयांचा नफा झाला. यावर्षी निसर्गाची साथ आणि योग्य व्यवस्थापनामुळे त्यांना भरघोस उत्पादन मिळाले. कमी पाण्यात संत्रा शेती कशी यशस्वी होऊ शकते, याचा उत्तम आदर्श त्यांनी उभा केला आहे.

वनोजा गावाचा संत्रा लागवडीकडे कल

वनोजा गावातील शेतकऱ्यांनी गेल्या दहा वर्षांत मोठ्या प्रमाणावर संत्रा लागवडीकडे वाटचाल केली आहे. आज या गावात शेकडो एकर जमिनीवर संत्रा बागायती विस्तारल्या आहेत. विशेष म्हणजे, या गावाने निर्यातक्षम संत्रा उत्पादनातही मोठे यश मिळवले आहे. त्यामुळे वनोजा परिसर आता केवळ स्थानिक बाजारपेठेत नव्हे, तर देश-विदेशातही आपल्या संत्रा उत्पादनासाठी ओळखला जाऊ लागला आहे.

उद्धवराव राऊत यांचे यश हे केवळ त्यांच्या मेहनतीचे नव्हे, तर आधुनिक शेती तंत्रज्ञानाचा योग्य वापर, शाश्वत पद्धतीने शेती व्यवस्थापन आणि स्मार्ट मार्केटिंग या सगळ्याचा परिणाम आहे. त्यांच्या या प्रवासातून इतर शेतकऱ्यांनी प्रेरणा घेतल्यास, पारंपरिक शेतीला अधिक लाभदायक आणि व्यावसायिक रूप देता येईल.