Filmcity In Vidharbha: मुंबई आणि हैदराबादनंतर आता विदर्भात फिल्मसिटी! मुंबईनंतर विदर्भात झळकणार रुपेरी पडद्याची दुनिया

Maharashtra News:- महाराष्ट्रातील चित्रपटसृष्टीचे केंद्र म्हणून ओळखली जाणारी मुंबई, येथे भारतातील सर्वात मोठी चित्रनगरी म्हणजेच दादासाहेब फाळके फिल्मसिटी (गोरेगाव) आहे. दुसऱ्या क्रमांकाची सर्वात मोठी फिल्मसिटी रामोजी फिल्मसिटी ही हैद्राबादमध्ये स्थित आहे. मात्र आता, महाराष्ट्रातच भारतातील तिसऱ्या क्रमांकाची सर्वात मोठी चित्रनगरी उभारली जाणार असून, ती नागपूर जिल्ह्यातील रामटेक येथे स्थापन केली जाणार आहे. राज्याचे सांस्कृतिक कार्य मंत्री आशिष शेलार यांनी या भव्य प्रकल्पाची अधिकृत घोषणा केली आहे.

रामटेक तालुक्यातील नवरगाव येथे उभारली जाणार फिल्मसिटी

विदर्भातील चित्रपट निर्मितीला चालना देण्यासाठी आणि स्थानिक कलाकारांना संधी देण्यासाठी ही फिल्मसिटी रामटेक तालुक्यातील नवरगाव येथे विकसित करण्यात येणार आहे. यासाठी तब्बल १२८ एकर जागा निश्चित करण्यात आली आहे, जी येत्या १५ दिवसांत अधिकृतरित्या सरकारकडे हस्तांतरित केली जाईल.

फिल्मसिटीच्या प्रभावी नियोजनासाठी एका अनुभवी सल्लागाराची नेमणूक करण्यात येणार आहे. मुंबईतील दादासाहेब फाळके चित्रनगरी आणि हैद्राबादमधील रामोजी फिल्मसिटी यांच्या धर्तीवर विकसित होणाऱ्या या प्रकल्पामुळे संपूर्ण मध्य भारतातील चित्रपट निर्मितीसाठी एक प्रमुख केंद्र निर्माण होईल. महाराष्ट्रातील मुंबईनंतर ही दुसरी सर्वात मोठी चित्रनगरी असेल.

रामटेक परिसराचा नैसर्गिक आणि ऐतिहासिक वारसा हा या फिल्मसिटीच्या निवडीमागील एक महत्त्वाचा घटक ठरला आहे. घनदाट जंगल, तलाव आणि डोंगररांगा यामुळे हा परिसर चित्रीकरणासाठी अत्यंत आकर्षक आहे. याशिवाय, रामटेक हे धार्मिक आणि ऐतिहासिक महत्त्वाचे ठिकाण आहे.

येथे प्रभू श्रीरामाने वनवासातील काही काळ घालवला होता, अशी आख्यायिका सांगितली जाते. या भागात रामटेकगड राम मंदिर, तोतलाडोह धरण, पेंच राष्ट्रीय उद्यान, नगरधनचा किल्ला यांसारखी अनेक प्रेक्षणीय ठिकाणे आहेत. त्यामुळे नैसर्गिकरित्या विविध पार्श्वभूमींचे चित्रीकरण येथे सहज शक्य होणार आहे.

या ठिकाणी फिल्म सिटी उभारणे ठरेल फायद्याचे

मध्य भारतातील अनेक कलाकार आणि चित्रपट निर्माते अद्यापही चित्रीकरणासाठी प्रामुख्याने मुंबई आणि हैद्राबाद येथील फिल्मसिटीवर अवलंबून आहेत. त्यामुळे त्यांना मोठ्या प्रमाणात वेळ आणि खर्च सहन करावा लागतो. मात्र, नागपूरच्या या नव्या चित्रनगरीमुळे विदर्भ, मध्य प्रदेश, छत्तीसगड आणि इतर शेजारील राज्यांतील कलाकार आणि तंत्रज्ञ यांना स्थानिक पातळीवरच दर्जेदार सुविधा उपलब्ध होतील. विशेषतः स्टुडिओ सेटअप, शूटिंग लोकेशन्स, अॅडव्हेंचर स्पोर्ट्स आणि निसर्गरम्य ठिकाणे यामुळे हा भाग चित्रपट निर्मितीसाठी अत्यंत अनुकूल ठरेल.

चिखलदरा हे विदर्भातील आणखी एक लोकप्रिय चित्रीकरण केंद्र आहे, जिथे अनेक चित्रपटांचे शूटिंग झाले आहे. त्यामुळे अनेक लोकप्रतिनिधींनी चिखलदरा येथेच फिल्मसिटी स्थापन करण्याची मागणी केली होती. मात्र, नागपूरच्या रामटेक परिसराची निवड करण्यात आली, कारण येथे चित्रीकरणासाठी आवश्यक भौगोलिक विविधता, आधुनिक पायाभूत सुविधा आणि वाहतुकीच्या दृष्टीने अनुकूलता अधिक आहे. या नव्या फिल्मसिटीमुळे विदर्भातील पर्यटन क्षेत्रालाही मोठी चालना मिळेल आणि स्थानिक रोजगार संधी वाढतील.

हा महत्त्वाकांक्षी प्रकल्प केवळ महाराष्ट्राच्याच नव्हे, तर संपूर्ण भारतीय चित्रपटसृष्टीसाठी एक नवे पर्व ठरू शकतो. नवीन निर्माते, तंत्रज्ञ आणि कलाकारांना येथे आधुनिक सुविधा आणि उत्तम लोकेशन्स मिळाल्याने चित्रपट, वेब सिरीज आणि जाहिरात उद्योगाला मोठी चालना मिळेल. महाराष्ट्र सरकारने घेतलेल्या या निर्णयामुळे नागपूरला एक नवी ओळख मिळणार असून, विदर्भ हा केवळ शेती आणि उद्योगांसाठी नव्हे, तर मनोरंजन क्षेत्रासाठीही महत्त्वाचा केंद्रबिंदू ठरेल.