Navi Mumbai Airport : 17 एप्रिलला उद्घाटन, मे महिन्यात प्रत्यक्ष उड्डाणे सुरू होण्याची शक्यता

Navi Mumbai Airport :  नवी मुंबई आंतरराष्ट्रीय विमानतळाच्या उभारणीने वेग घेतला असून, एप्रिल-मे 2025 पासून येथे देशांतर्गत प्रवासी आणि मालवाहतूक उड्डाणे सुरू होण्याची शक्यता आहे. सिडको महामंडळाने या दृष्टीने सर्व संबंधित यंत्रणांना कामाच्या गतीमध्ये वाढ करण्याचे निर्देश दिले आहेत.

विमानतळ प्रकल्पाची प्रगती आणि आढावा बैठक

शुक्रवारी सिडकोचे व्यवस्थापकीय संचालक विजय सिंघल यांनी विमानतळ प्रकल्पाची सविस्तर पाहणी केली. या बैठकीत अधिकाऱ्यांनी टर्मिनल इमारतीचे काम अंतिम टप्प्यात असल्याची माहिती दिली. विमानतळाच्या धावपट्टीचे काम मोठ्या प्रमाणात पूर्ण झाले असून, उर्वरित बांधकामे जलद गतीने सुरू आहेत.

या आढावा बैठकीस सिडकोचे सहव्यवस्थापकीय संचालक शांतनु गोयल, मुख्य महाव्यवस्थापक (परिवहन व विमानतळ) गीता पिल्लई तसेच नवी मुंबई आंतरराष्ट्रीय विमानतळ लिमिटेड (NMIAL) आणि सिडकोचे वरिष्ठ अधिकारी उपस्थित होते. या बैठकीत विमानतळाशी संबंधित विविध महत्त्वाच्या मुद्यांवर चर्चा करण्यात आली.

विमानतळाचे वाहतूक नेटवर्क आणि कनेक्टिव्हिटी

नवी मुंबई आंतरराष्ट्रीय विमानतळाला मुंबई आणि नवी मुंबईच्या विविध भागांशी जोडण्यासाठी अनेक पायाभूत सुविधा प्रकल्प सुरू आहेत. पश्चिमेकडून एमटीएचएल (मुंबई ट्रान्स-हार्बर लिंक) पुलाद्वारे मुंबईहून अवघ्या ३५ मिनिटांत विमानतळ गाठता येणार आहे. त्याचबरोबर पूर्वेकडून तीन मोठ्या उड्डाणपुलांची निर्मिती सुरू असून, राष्ट्रीय महामार्ग प्राधिकरणाकडून इंटरचेंजेसचे काम वेगाने सुरू आहे. हे पूर्ण झाल्यानंतर विमानतळ थेट मुंबई-पुणे द्रुतगती महामार्गाशी जोडले जाणार आहे.

विमानतळ संचालनाच्या तयारीत गती

सिडको आणि विमानतळ प्राधिकरणाने विमानतळ सुरू करण्याच्या सर्व प्रक्रियांना गती देण्याचा निर्णय घेतला आहे. यामध्ये एरोनॉटिकल इन्फॉर्मेशन पब्लिकेशन (AIP) तयार करणे हा महत्त्वाचा टप्पा आहे. कोणतेही नवीन आंतरराष्ट्रीय विमानतळ सुरू करण्यापूर्वी संबंधित विमानतळ प्राधिकरणाला ही अधिसूचना जाहीर करावी लागते. तसेच, विमानतळाला आवश्यक एरोड्रोम परवाने मिळवण्यासाठी सुरक्षाविषयक आणि भौतिक पायाभूत सुविधांची तपासणी केली जात आहे.

१७ एप्रिलला उद्घाटन

नवी मुंबई आंतरराष्ट्रीय विमानतळाच्या उद्घाटनाची तारीख १७ एप्रिल 2025 निश्चित करण्यात आली आहे. त्यानंतर मे महिन्यात प्रत्यक्ष प्रवासी आणि मालवाहतूक उड्डाणे सुरू करण्यासाठी सिडको व संबंधित यंत्रणांनी तयारी सुरू केली आहे.

विमानतळाच्या संपूर्ण प्रकल्पावर लक्ष ठेवण्यासाठी सिडकोच्या उच्च अधिकाऱ्यांची नियमित बैठक घेतली जात आहे. या विमानतळाच्या माध्यमातून नवी मुंबई आणि मुंबईतील वाहतूक व्यवस्थेवर सकारात्मक परिणाम होईल, तसेच व्यापार आणि पर्यटन क्षेत्रालाही चालना मिळेल.