Chemical ने पिकवलेले कलिंगड? ‘या’ सोप्या पद्धतीने ओळखा आणि विषबाधेपासून वाचा… जाणून घ्या अस्सल कलिंगड ओळखण्याच्या सिक्रेट ट्रिक

Identify Natural Watermelon tips:- बाजारात दिसणारी लालसर आणि गुळगुळीत कलिंगडे खरोखरच नैसर्गिकरीत्या पिकलेली आहेत का, याची खात्री करून घेणे गरजेचे आहे. उन्हाळ्यात कलिंगड खाण्याचा आनंद काही औरच असतो, परंतु योग्यरित्या पिकलेले आणि गोडसर कलिंगड निवडणे अनेकांसाठी कठीण जाते.

काही वेळा बाहेरून आकर्षक दिसणारे कलिंगड आतून कच्चे, गोडसर नसलेले किंवा अगदीच पाणचट निघते. याशिवाय, बाजारात विक्रीसाठी ठेवलेल्या काही कलिंगडांवर कृत्रिम रंग वापरला जातो, त्यामुळे फसवणूक टाळण्यासाठी काळजी घेणे आवश्यक आहे.
कलिंगड खरेदी करताना या गोष्टी बघा

कलिंगडचा रंग पहावा

कलिंगड खरेदी करताना त्याचा रंग आणि पोत पाहणे हा सर्वात महत्त्वाचा भाग आहे. नैसर्गिकरित्या पिकलेले कलिंगड गडद हिरव्या रंगाचे असते आणि त्याच्या सालीवर हलक्या रेघा किंवा डाग असतात. जर कलिंगडाचे बाह्यसर रूप खूप चमकदार असेल आणि त्यावर कोणतेही नैसर्गिक डाग नसतील, तर ते पूर्णपणे पिकलेले नसण्याची शक्यता असते. याशिवाय, कलिंगडाचे कवच किंचित खरडल्यास जर पांढरट किंवा पिवळसर रंग दिसला, तर ते नैसर्गिकरित्या पिकलेले असण्याची चिन्हे आहेत.

कलिंगडच्या तळाला असलेला पिवळसर डाग

तळाचा पिवळसर डाग देखील कलिंगडाच्या पिकलेपणाचा एक महत्त्वाचा संकेत आहे. जे कलिंगड नैसर्गिकरित्या जमिनीत वाढलेले असते, त्याच्या तळाच्या बाजूला एक मोठा पिवळसर डाग तयार होतो. हा डाग जितका गडद पिवळसर असेल, तितके कलिंगड अधिक गोडसर आणि रसाळ असते. जर हा डाग अगदीच फिकट किंवा पांढरट असेल, तर ते कच्चे असण्याची शक्यता जास्त असते. त्यामुळे कलिंगड खरेदी करताना हा भाग नीट पाहावा.

कलिंगडाला बोटांनी टॅप करून पहा

कलिंगडाच्या गोडसरपणाची खात्री करण्यासाठी बोटांनी टॅप करून त्याचा आवाज ऐकणे हा एक जुना पण खात्रीशीर उपाय आहे. जर कलिंगड टॅप केल्यावर ठणठणीत आणि आतून रिकामा असल्यासारखा आवाज आला, तर ते पूर्णपणे पिकलेले असते. पण जर आवाज जडसर आणि बधिर वाटला, तर ते कच्चे किंवा पाणचट असण्याची शक्यता असते. त्यामुळे खरेदी करण्यापूर्वी हा छोटा पण महत्त्वाचा टेस्ट नक्की करून पहावा.

कलिंगडचे वजन आणि त्याचा आकार

कलिंगडाचे वजन आणि आकार देखील त्याच्या चांगल्या प्रतीची साक्ष देतात. पिकलेले आणि गोडसर कलिंगड त्याच्या आकाराच्या तुलनेत नेहमीच जड वाटते. जर तुम्ही दोन समान आकाराची कलिंगडे उचलली आणि त्यातील एक वजनाने जड वाटले, तर ते अधिक गोडसर आणि रसाळ असण्याची शक्यता असते. मोठ्या किंवा फारच लहान कलिंगडांपेक्षा मध्यम आकाराचे, प्रमाणबद्ध गोलसर किंवा किंचित लांबट कलिंगड अधिक चांगले असते.

कलिंगडचे देठ पाहणे

कलिंगडाच्या देठावरूनही त्याचे पिकलेपण ओळखता येते. जर देठ वाळलेला आणि तपकिरी रंगाचा असेल, तर ते नैसर्गिकरित्या पूर्णपणे पिकलेले असते. पण जर देठ अजूनही हिरवट आणि ताजातवाना वाटत असेल, तर ते कच्चे तोडलेले असण्याची शक्यता असते. याशिवाय, कलिंगडाच्या सालीवर फारशा खाचा किंवा गाठा नसलेल्या, गुळगुळीत पण किंचित असमान पोत असलेल्या कलिंगडांची निवड करावी.

कलिंगडाची गुणवत्ता त्याच्या रंग, तळाचा पिवळसर डाग, टॅप केल्यावर येणारा आवाज, वजन, देठ आणि पोत यावरून सहज ओळखता येते. ही सोपी आणि खात्रीशीर टिप्स लक्षात ठेवून तुम्हीही यंदाच्या उन्हाळ्यात गोडसर, रसाळ आणि उत्तम कलिंगड खरेदी करू शकता.