Maharashtra Weather: कडक उन्हात गारवा! राज्याच्या ‘या’ भागात आज, उद्या पाऊस… जाणून घ्या तुमच्या जिल्ह्यात कधी बरसणार सरी

Maharashtra Havaman:- होळी उलटताच उन्हाचा जोर वाढण्याची अपेक्षा असते, मात्र यंदा हवामानाने वेगळाच खेळ खेळला आहे. फेब्रुवारीच्या पहिल्या पंधरवड्यातच उन्हाच्या तीव्रतेत मोठी वाढ झाली असून काही ठिकाणी तापमानाने चाळीशी गाठली आहे. वाढत्या तापमानामुळे उष्णतेची लाट जाणवत असून नागरिक घामाच्या धारांत अक्षरशः होरपळत आहेत.

तापमानवाढीचा परिणाम केवळ कमाल तापमानावरच नाही, तर किमान तापमानातही मोठी वाढ झाली आहे. अशा परिस्थितीत भारतीय हवामान खात्याने मराठवाडा आणि मध्य महाराष्ट्रात आज आणि उद्या पावसाच्या हलक्या सरींची शक्यता वर्तवली आहे. मात्र, या दोन दिवसांनंतर पुन्हा कडक उन्हाचा सामना करावा लागणार आहे.

पावसाचे कारण काय?

ईशान्य भारतात सध्या चक्राकार वारे वाहत आहेत आणि त्यामुळे कमी दाबाचा पट्टा तयार झाला आहे. या प्रभावामुळे मेघालय, पश्चिम बंगाल आणि ओडिशामध्ये जोरदार पावसाचा अंदाज वर्तवण्यात आला आहे. पूर्वेकडील वाऱ्यांच्या परिणामामुळे केरळपासून मध्य महाराष्ट्रापर्यंत कमी दाबाचा पट्टा सरकला आहे, त्यामुळेच मराठवाडा आणि मध्य महाराष्ट्रातील काही भागांत हलक्या सरी पडू शकतात.

वाढते तापमान: मुंबई, पुणे, लातूर, कराडमध्ये चाळिशीची वाटचाल
राज्यात कमाल तापमान वेगाने वाढत असून मुंबईत शनिवारी तापमान ३७ अंश सेल्सिअस पार गेले, ठाण्यातही हाच आकडा नोंदवण्यात आला. पुण्यातही अलीकडे तापमानवाढीचा मोठा प्रभाव जाणवत असून काल पुण्यात ३६.२ अंश सेल्सिअस तापमानाची नोंद झाली.

मराठवाड्यातील लातूर येथे ३७ अंश, छत्रपती संभाजीनगर येथे ३६ अंश तापमानाची नोंद करण्यात आली. राज्यातील सर्वाधिक तापमान सातारा जिल्ह्यातील कराड तालुक्यात ३९.७ अंश सेल्सिअस इतके नोंदवले गेले, जे अत्यंत चिंताजनक आहे.

दोन दिवस पाऊस, पण तापमान कायम राहणार

हवामान खात्याने जरी मराठवाडा आणि मध्य महाराष्ट्रात हलक्या सरी पडण्याचा अंदाज व्यक्त केला असला, तरीही तापमानात फारसा बदल होणार नाही. विदर्भासह संपूर्ण राज्यभर उन्हाचा तडाखा कायम राहणार असून उन्हाळ्याचा जोर दिवसेंदिवस वाढतच जाणार आहे. गेल्या काही दिवसांत रात्री आणि पहाटे थोडा गारवा जाणवत होता, मात्र आता उन्हाची तीव्रता सतत वाढत आहे.

नागरिकांनी काय काळजी घ्यावी?

थेट उन्हात जाणे टाळा: शक्य असल्यास सकाळी ११ ते दुपारी ४ या वेळेत घराबाहेर जाण्याचे टाळा.

पाणी व द्रवपदार्थांचा अधिक वापर करा: शरीरात पाण्याची कमतरता भासू नये यासाठी वारंवार पाणी प्या.

हलका आणि सैलसर कपडे घाला: उष्णतेपासून संरक्षण मिळण्यासाठी सूती आणि हलके कपडे परिधान करा.

डोके झाकून ठेवा: उन्हात बाहेर पडताना टोपी, स्कार्फ किंवा छत्रीचा वापर करा.

उन्हाच्या झळा अधिकच वाढणार

पावसाच्या हलक्या सरींनी दोन दिवस थोडासा दिलासा मिळेल, मात्र त्यानंतर तापमान पुन्हा वाढणार आहे. त्यामुळे नागरिकांनी उन्हाळ्यापासून बचाव करण्यासाठी आवश्यक ती खबरदारी घेणे अत्यंत गरजेचे आहे. उन्हाचा त्रास टाळण्यासाठी योग्य पथ्ये पाळा आणि स्वतःची काळजी घ्या.