Maharashtra Havaman : सूर्य आग ओकतोय, पण अचानक पावसाचा शिडकावा… महाराष्ट्रासाठी मोठा हवामान इशारा!

Maharashtra Havaman:- देशभरातील हवामानात मोठे बदल पाहायला मिळत असून, यामुळे नागरिकांच्या मनात नेमका कोणता ऋतू सुरू आहे, याबद्दल संभ्रम निर्माण झाला आहे. गेल्या 24 तासांमध्ये काही राज्यांमध्ये हवामानाने अचानक करवट घेतली असून, शुक्रवारी संध्याकाळी अचानक पावसाची नोंद झाली. यामुळे राजस्थान, मध्य प्रदेश आणि दिल्लीमध्ये तापमानात किंचित घट झाली आहे. उत्तर भारतातील काही भागांत या अनपेक्षित पावसामुळे नागरिकांना उष्णतेपासून काहीसा दिलासा मिळाला असला तरी हा आराम फार काळ टिकणार नाही. भारतीय हवामान विभागाच्या अंदाजानुसार, ओडिशा, मध्य प्रदेश आणि गुजरातमध्ये 14 ते 18 मार्चदरम्यान पुन्हा एकदा उष्णतेच्या लाटेची शक्यता आहे, त्यामुळे या भागांमध्ये तापमान झपाट्याने वाढण्याचा इशारा देण्यात आला आहे.

महाराष्ट्रात उन्हाच्या झळा

महाराष्ट्रातही उन्हाच्या झळा वाढत असून विदर्भ हा सध्या सर्वाधिक उष्णतेचा फटका बसलेला प्रदेश ठरत आहे. कोकणमध्ये तापमानात वाढ होत असताना विदर्भात पारा 40 अंशांच्या जवळ पोहोचला आहे. ब्रह्मपुरी येथे सर्वाधिक 42 अंश सेल्सिअस तापमानाची नोंद झाली असून, त्यामुळे आगामी उन्हाळ्याबाबत चिंता व्यक्त केली जात आहे. हवामान विभागाने पुढील 24 तासांत ही स्थिती कायम राहील असा अंदाज व्यक्त केला आहे. विशेषतः चंद्रपूर, अकोला, नागपूर आणि वर्धा या भागांमध्ये कमाल तापमानात 1 ते 2 अंशांची वाढ होण्याची शक्यता आहे.

मुंबई आणि उपनगरांमध्येही उकाडा वाढला आहे. प्रशासनाने नागरिकांना दुपारच्या कडाक्याच्या उन्हात घराबाहेर पडण्याचे टाळण्याचा सल्ला दिला आहे. उत्तर महाराष्ट्र मात्र या परिस्थितीत थोडा वेगळा आहे. इथे अद्याप पहाटेच्या वेळेस काहीसा गारठा जाणवत आहे, पण दुपारनंतर उष्णतेच्या झळा जाणवत आहेत. राज्यात तुरळक ठिकाणी अंशतः ढगाळ हवामान दिसून आले असले तरी उष्णता मात्र अधिक तीव्र होत आहे.

देशाच्या दक्षिण किनारपट्टीवरही उष्णतेचा प्रभाव जाणवत आहे. समुद्राच्या पृष्ठभागावरून वाहणाऱ्या गरम वाऱ्यांमुळे इथेही नागरिकांना वाढत्या तापमानाचा सामना करावा लागत आहे. हवामान विभागाच्या अंदाजानुसार, तामिळनाडूच्या काही भागांमध्ये समुद्रावर होणाऱ्या बाष्पीभवन आणि वाऱ्याच्या दाबातील बदलांमुळे पावसाची शक्यता आहे. दरम्यान, उत्तर भारतातील पर्वतीय प्रदेशातही हवामानाचा परिणाम जाणवत असून, हिमाचल प्रदेश आणि उत्तराखंडमध्ये पावसाने हजेरी लावली आहे. या भागांसाठी हवामान विभागाने विजांच्या कडकडाटासह पावसाचा यलो अलर्ट जारी केला आहे. पर्वतीय भागांसाठी विशेषतः हिमवृष्टीचा इशारा देण्यात आला आहे, त्यामुळे येथील नागरिकांनी काळजी घेण्याचे आवाहन करण्यात आले आहे.

एकूणच, देशभरात हवामानात होत असलेल्या अनपेक्षित बदलांमुळे अनेक राज्यांमध्ये उष्णतेच्या लाटेसह काही ठिकाणी पावसाचा सामना नागरिकांना करावा लागत आहे. आगामी काही दिवसांत महाराष्ट्रासह देशाच्या विविध भागांमध्ये उष्णता वाढण्याचा अंदाज असून, नागरिकांनी स्वतःची काळजी घेण्याचे आवाहन हवामान विभागाने केले आहे.