Keli Lagwad: 2 एकरमध्ये 100 टन केळीचे उत्पादन! मिळवला 6.50 लाखांचा नफा… जाणून घ्या आधुनिक शेतीचा नवा पॅटर्न

Farmer Success Story:- अमरावती जिल्ह्यातील मोर्शी आणि वरूड तालुका संत्रा उत्पादनासाठी ओळखला जातो. मात्र, पारंपरिक शेती पद्धतीत सातत्याने सुधारणा करत अनेक शेतकरी आता वेगवेगळ्या पिकांकडे वळत आहेत. जरूड येथील नितीन देशमुख हे असेच एक प्रयोगशील शेतकरी असून, त्यांनी आधुनिक तंत्रज्ञानाच्या मदतीने केळी शेतीत मोठे यश मिळवले आहे. केवळ 2 एकर क्षेत्रात त्यांनी तब्बल 100 टन केळीचे उत्पादन घेतले आहे, जे परिसरातील इतर शेतकऱ्यांसाठी प्रेरणादायी ठरत आहे.

आधुनिक तंत्रज्ञानाचा वापर आणि यशस्वी प्रयोग

नितीन देशमुख यांच्याकडे वडिलोपार्जित 35 एकर शेती आहे. त्यांचे तीन भावंडे असली तरी, शेतीची संपूर्ण जबाबदारी ते सांभाळतात. प्रारंभी पारंपरिक पद्धतीने शेती करताना त्यांना फारसे समाधानकारक उत्पन्न मिळत नव्हते. परिणामी, त्यांनी नव्या पद्धतींचा अवलंब करण्याचा निर्णय घेतला. 20 वर्षांपूर्वी त्यांनी संत्रा आणि केळीच्या झाडांची लागवड सुरू केली. मात्र, पारंपरिक केळी लागवडीत अपेक्षित उत्पादन मिळत नव्हते. त्यामुळे दोन वर्षांनंतर त्यांनी टिशू कल्चर तंत्रज्ञानाचा अवलंब करत जी-9 जातीची केळी लावली.

ठिबक सिंचनाने पाण्याचा कार्यक्षम वापर

नितीन देशमुख यांनी आपल्या शेतात ठिबक सिंचन प्रणाली बसवली आहे. यामुळे कमी पाण्यातही केळीची झाडे जोमाने वाढतात. ठिबक सिंचनामुळे पाण्याचा अपव्यय टाळला जातो आणि मुळांपर्यंत आवश्यक प्रमाणात ओलावा पोहोचतो. परिणामी, केळीचे पीक अधिक सशक्त होते आणि उत्पादन वाढते. यावर्षी पहिली कटाई झाल्यानंतर झाडे पुन्हा बहरली असून, पुढील उत्पादनासाठी ती तयार होत आहेत.

2 एकरमध्ये 100 टन उत्पादन आणि 6.50 लाखांचा नफा

यावर्षी नितीन देशमुख यांनी केळीच्या 2 एकर बागेत 100 टन उत्पादन मिळवले आहे. सध्या केळीला प्रति टन 10 हजार रुपये बाजारभाव मिळत आहे. त्यामुळे एकूण विक्रीतून त्यांना 10 लाख रुपये उत्पन्न मिळाले. त्यातील विविध खर्च वजा जाता त्यांना 6 ते 6.50 लाख रुपये निव्वळ नफा झालेला आहे. पारंपरिक शेतीत एवढे उत्पन्न मिळवणे कठीण असते, मात्र योग्य तंत्रज्ञानाचा वापर केल्यास अल्प भूखंडावरही मोठे उत्पादन घेता येते, हे त्यांनी सिद्ध करून दाखवले आहे.

शेतकऱ्यांसाठी प्रेरणादायी उदाहरण

20 वर्षांपूर्वी जरूड गावात केळीची लागवड करणारे शेतकरी मोजकेच होते. मात्र, नितीन देशमुख यांनी आपल्या यशस्वी प्रयोगाच्या अनुभवावरून इतर शेतकऱ्यांना मार्गदर्शन करणे सुरू केले आहे. त्यांचे म्हणणे आहे की, इतर काही प्रकारच्या शेतीत तोटा होतो, तो केळी शेतीतून भरून काढता येतो. त्यामुळे अनेक शेतकरी आता केळी लागवडीकडे वळले आहेत. आधुनिक तंत्रज्ञान, योग्य नियोजन आणि परिश्रमाच्या जोरावर शेतकरी कमी क्षेत्रातही अधिक नफा मिळवू शकतात, हे त्यांनी आपल्या यशाने सिद्ध केले आहे.