Home Buying Tips: महागडं घर घ्यायचंय? ‘हा’ आर्थिक फार्मूला तुम्हाला योग्य निर्णय घेण्यास मदत करेल… नाहीतर आर्थिक संकट अटळ

Home Buying Formula:- घर खरेदी करणे हे केवळ एक स्वप्न पूर्ण करण्यासारखे नसून, ते एक मोठे आर्थिक निर्णय आणि गुंतवणूक देखील आहे. त्यामुळे हा निर्णय घेताना योग्य आर्थिक नियोजन करणे आवश्यक असते, अन्यथा भविष्यात आर्थिक ओझ्याखाली दबले जाण्याची शक्यता असते. यासाठीच 5/20/30/40 हा नियम महत्त्वाचा ठरतो.

या नियमाचे स्वरूप

सर्वप्रथम, तुम्ही तुमच्या वार्षिक उत्पन्नाच्या ५ पट पेक्षा जास्त महागडे घर घेऊ नये. याचा अर्थ असा की, जर तुमचे वार्षिक उत्पन्न १२ लाख रुपये असेल, तर जास्तीत जास्त ६० लाख रुपयांपर्यंतच्या घराच्या खरेदीचे नियोजन करावे. जर तुम्ही यापेक्षा अधिक किमतीचे घर घेण्याचा विचार करत असाल, तर भविष्यातील आर्थिक सुरक्षेसाठी ते जोखीम असू शकते, कारण त्यामुळे तुमच्या उत्पन्नाच्या मानाने जास्त कर्ज घ्यावे लागेल आणि कर्ज फेडण्याचा कालावधीही वाढेल. दुसरे महत्त्वाचे तत्व म्हणजे गृहकर्जाची मुदत शक्यतो २० वर्षांच्या आत ठेवावी.

अनेक जण मोठ्या कर्जाच्या हप्त्यांपासून सुटका मिळावी म्हणून अधिक दीर्घ मुदतीचे कर्ज घेण्याचा विचार करतात, मात्र यामुळे एकूण व्याजाचा खर्च प्रचंड वाढतो. २० वर्षांच्या आत कर्ज फेडले, तर व्याजाचा भार कमी राहतो आणि तुम्हाला आर्थिकदृष्ट्या जास्त सुरक्षित वाटते.

तिसरा महत्त्वाचा घटक म्हणजे तुमचा ईएमआय तुमच्या मासिक उत्पन्नाच्या ३०% पेक्षा अधिक नसावा. उदाहरणार्थ, जर तुम्ही महिन्याला १ लाख रुपये कमवत असाल, तर घराच्या कर्जाचा ईएमआय ३० हजार रुपयांपेक्षा जास्त नसावा. जर ईएमआय अधिक असेल, तर तुमच्या इतर गरजेच्या खर्चांवर मर्यादा येऊ शकते आणि इमर्जन्सी फंड तयार करणे कठीण होऊ शकते. चौथा आणि सर्वांत महत्त्वाचा नियम म्हणजे किमान ४०% रक्कम डाउन पेमेंट म्हणून भरणे.

याचा फायदा असा की, कर्जाची रक्कम कमी होते आणि परिणामी एकूण व्याजाचा भारही कमी होतो. उदाहरणार्थ, जर तुम्ही ५० लाख रुपयांचे घर खरेदी करत असाल, तर किमान २० लाख रुपये डाउन पेमेंटसाठी वाचवण्याचा प्रयत्न करा. हे जरी कठीण वाटत असले, तरी दीर्घकालीन फायदा लक्षात घेऊन योग्य नियोजन करणे गरजेचे आहे.

या नियमांचे पालन केल्यास घर खरेदीसाठी घेतलेले कर्ज आर्थिक दृष्टिकोनातून सुरक्षित राहते आणि भविष्यात कोणत्याही आर्थिक संकटाला सामोरे जाण्याची शक्यता कमी होते. मात्र, काही परिस्थितींमध्ये हा नियम पाळणे प्रत्येकासाठी शक्य नसते. जसे की, घराच्या वाढत्या किंमती, उत्पन्नाच्या अस्थिरता, मोठ्या शहरांमधील महागडी मालमत्ता, इत्यादी कारणांमुळे काही जणांना हा नियम कठोर वाटू शकतो. अशा परिस्थितीत, आपल्या गरजा आणि आर्थिक क्षमता यांचा योग्य तो अंदाज घेऊन निर्णय घेणे महत्त्वाचे ठरते.

सध्या होमलोन घेण्याची योग्य वेळ

याशिवाय, सध्या गृहकर्ज घेण्याची ही योग्य वेळ ठरू शकते, कारण भारतीय रिझर्व्ह बँकेने (RBI) रेपो दरात कपात केल्यानंतर एसबीआय (SBI), युनियन बँक ऑफ इंडिया आणि सेंट्रल बँक ऑफ इंडिया या मोठ्या बँकांनी व्याजदर कमी केले आहेत. त्यामुळे आता गृहकर्जाचे दर वार्षिक ८.१०% पासून सुरू होत आहेत, जे नवीन घर खरेदी करणाऱ्यांसाठी फायदेशीर ठरू शकते. त्यामुळे, जर तुम्ही घर खरेदी करण्याचा विचार करत असाल, तर योग्य नियोजन करून हा नियम पाळण्याचा प्रयत्न करा, कारण दीर्घकालीन आर्थिक स्थैर्यासाठी ही एक शहाणपणाची गुंतवणूक ठरू शकते.