Heatwave Alert: IMD चा गंभीर इशारा! पुढील दोन दिवस महाराष्ट्रात हिटवेव्ह…. राज्यातील ‘या’ भागात पारा 40° वर जाण्याची शक्यता

Maharashtra Havaman:-  राज्यात उष्णतेचा तीव्र कहर जाणवत असून, हवामान खात्याने पुढील काही दिवस तापमान झपाट्याने वाढण्याचा इशारा दिला आहे. नवीन वर्षाच्या सुरुवातीपासूनच हवामानात मोठे चढ-उतार होत असल्याचे दिसत आहे. काही ठिकाणी ढगाळ हवामान राहिले असले तरी, काही ठिकाणी उन्हाचा तडाखा अधिक तीव्र झाला आहे. भारतीय हवामान विभागाने (IMD) महाराष्ट्रातील काही भागांमध्ये उष्णतेच्या लाटेचा इशारा दिला असून, नागरिकांनी आवश्यक ती खबरदारी घ्यावी, असे आवाहन करण्यात आले आहे.

काय आहे हवामान विभागाचा अंदाज?

IMD च्या अंदाजानुसार, पुढील २४ तासांत पश्चिम महाराष्ट्रातील तापमान मोठ्या प्रमाणात वाढणार आहे. विशेषतः कोकण आणि नजीकच्या भागांमध्ये उष्ण आणि दमट हवामानाचा प्रभाव राहणार असून, या भागांसाठी यलो अलर्ट जारी करण्यात आला आहे. विदर्भातही उन्हाचा प्रभाव वाढला असून, दुपारी उन्हाच्या तीव्रतेमुळे घराबाहेर पडणे कठीण होत आहे. उत्तर महाराष्ट्रात अजूनही पहाटे काही प्रमाणात गारवा जाणवत असला तरी, लवकरच या भागातही तापमानवाढ होण्याची शक्यता हवामान खात्याने वर्तवली आहे.

हवामान विभागाचे माजी प्रमुख डॉ. के. एस. होसाळीकर यांच्या माहितीनुसार, २५ आणि २६ फेब्रुवारी रोजी महाराष्ट्रातील काही जिल्ह्यांमध्ये उष्णतेच्या लाटेचा प्रभाव जाणवेल. २५ फेब्रुवारी रोजी मुंबई, ठाणे, रायगड आणि रत्नागिरी या भागांमध्ये उष्णतेची तीव्रता अधिक जाणवेल, तर २६ फेब्रुवारी रोजी पालघर जिल्ह्यात तापमान झपाट्याने वाढण्याची शक्यता आहे.

गेल्या काही दिवसांपासून महाराष्ट्रासह मध्य प्रदेश आणि राजस्थानमध्ये तापमान झपाट्याने वाढताना दिसत आहे. फेब्रुवारी महिन्यातच तापमान ३८ अंश सेल्सिअसपर्यंत पोहोचल्याने, यंदाचा उन्हाळा अत्यंत उष्ण आणि कडाक्याचा ठरेल, अशी भीती नागरिक व्यक्त करत आहेत. हवामान विभागाच्या अंदाजानुसार, पुढील काही दिवस राज्यात उष्णतेची तीव्रता कायम राहणार असल्याने, नागरिकांनी आरोग्याची योग्य ती काळजी घ्यावी.

उष्णतेपासून बचाव करण्यासाठी ही काळजी घ्या

उष्णतेपासून बचाव करण्यासाठी नागरिकांनी दुपारी १२ ते ४ या वेळेत शक्यतो घराबाहेर जाणे टाळावे. शरीरातील पाण्याची कमतरता टाळण्यासाठी भरपूर पाणी प्यावे आणि ओआरएस, लिंबूपाणी किंवा फळांचे रस घेण्यास प्राधान्य द्यावे. उन्हात बाहेर पडताना टोपी, गॉगल किंवा छत्रीचा वापर करावा आणि हलके, सुती कपडे घालावे. आहारामध्ये अधिक फळे आणि भाज्यांचा समावेश करून, जड व तेलकट पदार्थ टाळावेत.

शेतकऱ्यांसाठी महत्त्वाच्या सूचना

शेतकऱ्यांसाठी उष्णतेचा प्रभाव टाळण्यासाठी काही महत्त्वाच्या सूचना देण्यात आल्या आहेत. कमाल तापमान वाढत असल्याने, जनावरांना सावलीत ठेवणे आवश्यक आहे आणि त्यांना नियमितपणे थंड व स्वच्छ पाणी द्यावे. गोठ्याच्या छतावर गवताचे आच्छादन ठेवल्यास उष्णतेचा प्रभाव कमी करता येईल. जनावरांना सकाळी किंवा संध्याकाळी चारण्यासाठी बाहेर सोडावे आणि त्यांच्या आहारात हिरवा चारा, प्रथिनयुक्त खाद्य आणि खनिजमिश्रणाचा समावेश करावा.

राज्यातील तापमान दिवसेंदिवस वाढत असल्याने, नागरिकांनी आणि शेतकऱ्यांनी योग्य ती खबरदारी घेणे आवश्यक आहे. उन्हाळ्याचा प्रभाव अधिक तीव्र होण्याची शक्यता असल्याने, हवामान विभागाच्या अपडेट्सवर लक्ष ठेवणे गरजेचे आहे. पुढील काही दिवस उन्हाचा जोर कायम राहणार असल्याने, आरोग्याची काळजी घेण्यावर भर देण्याचे आवाहन करण्यात आले आहे.