शेतकऱ्यांसाठी आनंदाची बातमी ! आता वारंवार KYC करण्याची गरज नाही, ‘फार्मर आयडी’ कसं काम करेल?
मुंबई: केंद्र सरकारने शेतकऱ्यांसाठी मोठा निर्णय घेतला आहे. आता शेतकरी ओळखपत्र (Farmer ID) अनिवार्य करण्यात आले असून, आधार कार्डप्रमाणेच शेतकऱ्यांना युनिक आयडी क्रमांक देण्यात येणार आहे. या ओळखपत्रामुळे शेतकऱ्यांना सरकारी योजनांचे लाभ सहज मिळतील आणि वारंवार KYC करण्याच्या झंझटीतून मुक्ती मिळेल. महाराष्ट्रासह अनेक राज्यांमध्ये फार्मर आयडी देण्याची प्रक्रिया सुरू झाली आहे.
शेतकरी ओळखपत्र म्हणजे काय?
आधार कार्डप्रमाणेच फार्मर आयडी हे शेतकऱ्यांची अधिकृत ओळख प्रमाणित करणारे डिजिटल डॉक्युमेंट असेल. याचा वापर प्रधानमंत्री किसान सन्मान निधी, पीक विमा योजना आणि अन्य कृषी योजनांसाठी केला जाणार आहे. या डिजिटल ओळखपत्रात शेतकऱ्यांची जमीन, पशुधन, पिकांची माहिती आणि आर्थिक तपशील साठवले जातील.
KYC ची कटकट मिटणार कशी?
शेतकरी ओळखपत्र एकदा तयार झाल्यानंतर शेतकऱ्यांना वारंवार KYC करण्याची गरज भासणार नाही. आतापर्यंत वेगवेगळ्या सरकारी योजनांसाठी प्रत्येक वेळी नवीन KYC करावे लागत होते, मात्र फार्मर आयडीमुळे हे एकदाच केले जाईल आणि त्यानंतर सर्व योजनांचे लाभ ऑटोमॅटिक मिळू शकतील.
शेतकरी ओळखपत्र का आवश्यक आहे?
शेती क्षेत्रात मोठे बदल घडवण्यासाठी केंद्र सरकारने ‘डिजिटल कृषी अभियान’ सुरू केले आहे. या योजनेसाठी 2,817 कोटी रुपयांचा निधी मंजूर करण्यात आला आहे. यामध्ये संपूर्ण कृषी माहिती डिजिटल स्वरूपात संकलित केली जाईल. शेतकऱ्यांचे उत्पन्न वाढवण्यासाठी आणि कृषी व्यवस्थापन सुधारण्यासाठी हे मोठे पाऊल मानले जात आहे.
महाराष्ट्रासह 19 राज्यांमध्ये प्रायोगिक प्रकल्प सुरू
सध्या 19 राज्यांनी या योजनेसाठी कृषी मंत्रालयासोबत करार केला आहे. उत्तर प्रदेश, पंजाब आणि महाराष्ट्र यासारख्या राज्यांमध्ये प्रत्येकी एका जिल्ह्यात हा प्रकल्प प्रायोगिक तत्त्वावर राबवला जात आहे. लवकरच संपूर्ण देशभरात फार्मर आयडी लागू होईल.
शेतकऱ्यांना होणारे फायदे
- वारंवार KYC करण्याची गरज नाही.
- शेतीविषयक सरकारी योजनांचे लाभ थेट मिळणार.
- पिकांची आणि जमिनीची डिजिटल नोंद उपलब्ध होणार.
- पीक विमा आणि अनुदान पटकन मिळू शकणार.
- बँकेकडून कर्ज घेण्याची प्रक्रिया सोपी होणार.
शेतकऱ्यांसाठी सरकारचे पुढचे पाऊल
शेतकऱ्यांचे उत्पन्न वाढवण्यासाठी आणि सरकारी योजनांचा लाभ अधिक पारदर्शक करण्यासाठी फार्मर आयडी गेमचेंजर ठरू शकते. यामुळे शेतकऱ्यांचे डिजिटल प्रोफाइल तयार होईल आणि सर्व योजनांचा थेट लाभ त्यांच्या खात्यात पोहोचेल.
शेतकऱ्यांनी लवकरच आपली माहिती अद्ययावत करून फार्मर आयडीसाठी नोंदणी करणे आवश्यक आहे. लवकरच महाराष्ट्रात याची अधिकृत प्रक्रिया सुरू होईल.