Gold Price Today: सोन खरेदी करणार आहात? एका दिवसात १,०४८ रुपयांची वाढ… आजचे दर पाहून धक्काच बसेल!

Gold Price Today: सोने आणि चांदीच्या किमतींनी सोमवारी (१७ मार्च) नवा उच्चांक गाठला आहे. इंडिया बुलियन अँड ज्वेलर्स असोसिएशन (IBJA) च्या माहितीनुसार, २४ कॅरेट सोन्याच्या १० ग्रॅमची किंमत १,०४८ रुपयांनी वाढून ८७,८९१ रुपये झाली आहे. याआधी १३ मार्च रोजी सोन्याने ८६,८४३ रुपयांचा उच्चांक गाठला होता. तसेच, चांदीच्या किमतीतही मोठी वाढ झाली असून, ती १,३६३ रुपयांनी महागून ९९,६८५ रुपये प्रति किलोवर पोहोचली आहे. गेल्या आठवड्यात गुरुवारी (१३ मार्च) चांदीचा भाव ९८,३२२ रुपये होता. यापूर्वी २३ ऑक्टोबर २०२४ रोजी चांदीने ९९,१५१ रुपये प्रति किलोचा उच्चांक गाठला होता.

देशातील प्रमुख शहरातील सोन्याचे दर

देशातील प्रमुख महानगरांमध्ये सोन्याच्या दरात वाढ झाली आहे. दिल्लीमध्ये २२ कॅरेट सोन्याचा दर ८२,२५० रुपये आणि २४ कॅरेट सोन्याचा दर ८९,७१० रुपये प्रति १० ग्रॅम आहे. मुंबई, कोलकाता आणि चेन्नईमध्ये २२ कॅरेट सोन्याची किंमत ८२,१०० रुपये आणि २४ कॅरेट सोन्याची किंमत ८९,५६० रुपये प्रति १० ग्रॅम आहे. या दरांमध्ये स्थानिक कर आणि उत्पादन शुल्कानुसार किंचित फरक पडू शकतो.

सोन्याच्या किमतीत वाढ होण्यामागे तीन प्रमुख कारणे

सोन्याच्या किमतीत वाढ होण्यामागे तीन प्रमुख कारणे आहेत. पहिलं कारण म्हणजे, अमेरिकेचे माजी अध्यक्ष डोनाल्ड ट्रम्प यांच्या कार्यकाळात वाढलेला भू-राजकीय तणाव. यामुळे गुंतवणूकदार सुरक्षित गुंतवणुकीकडे वळले आहेत. दुसरं कारण म्हणजे, डॉलरच्या तुलनेत भारतीय रुपयाचं अवमूल्यन झाल्याने आयात खर्च वाढला आहे, ज्याचा थेट परिणाम सोन्याच्या किमतीवर झाला आहे. तिसरं कारण म्हणजे, शेअर बाजारातील अस्थिरतेमुळे आणि घसरणीमुळे गुंतवणूकदारांनी सुरक्षित पर्याय म्हणून सोन्यात अधिक गुंतवणूक करणे पसंत केले आहे.

गेल्या एक वर्षातील सोन्याच्या दरातील वाढ

या वर्षाच्या सुरुवातीपासून म्हणजेच १ जानेवारीपासून आतापर्यंत, फक्त ७६ दिवसांत सोन्याच्या किमतीत ११,७२९ रुपयांची वाढ झाली आहे. २४ कॅरेट सोन्याचा दर ७६,१६२ रुपयांवरून थेट ८७,८९१ रुपयांवर पोहोचला आहे. चांदीच्या बाबतीतही मोठी वाढ झाली असून, तिचा दर ८६,०१७ रुपयांवरून ९९,६८५ रुपयांवर पोहोचला आहे. म्हणजेच, चांदीच्या किमतीत १३,६६८ रुपयांची वाढ झाली आहे.

सोन्याचे दर भविष्यात आणखी वाढण्याची शक्यता

सोन्याचे दर भविष्यात आणखी वाढण्याची शक्यता आहे. केडिया अ‍ॅडव्हायझरीचे संचालक अजय केडिया यांच्या मते, मोठ्या तेजीनंतर सोन्याचे दर घसरण्याची अपेक्षा होती, परंतु भू-राजकीय तणावामुळे हे होऊ शकले नाही. अमेरिकेनंतर युनायटेड किंगडमने देखील व्याजदरात कपात केली आहे. त्यामुळे गुंतवणूकदारांनी सोन्यातील गुंतवणूक वाढवली आहे. याशिवाय, गोल्ड ईटीएफमधील गुंतवणूकही वाढत असून, त्यामुळे सोन्याची मागणी वाढली आहे. या परिस्थितीत, यावर्षी सोन्याचा दर प्रति १० ग्रॅम ९० हजार रुपयांपर्यंत पोहोचण्याची शक्यता तज्ज्ञांनी व्यक्त केली आहे.

सोने खरेदी करताना ही काळजी घ्या

सोनं खरेदी करताना ग्राहकांनी नेहमी भारतीय मानक ब्युरो (BIS) द्वारे प्रमाणित हॉलमार्क केलेलेच सोने खरेदी करावे. हॉलमार्क केलेल्या सोन्यावर ६ अंकी युनिक कोड असतो, ज्याला हॉलमार्क युनिक आयडेंटिफिकेशन नंबर (HUID) म्हणतात. ही संख्या अल्फान्यूमेरिक स्वरूपात असते, जसे की "AZ4524". या कोडच्या माध्यमातून सोन्याची शुद्धता आणि दर्जा तपासता येतो. ग्राहकांनी नेहमी प्रमाणित सोनेच खरेदी करून आपल्या गुंतवणुकीचं संरक्षण करावं.