Gold Price : सोन्याच्या किंमतीत विक्रमी वाढ! 88,000 रुपये प्रति 10 ग्रॅम पार, पुढे काय होणार?

Gold Price : गेल्या काही महिन्यांत सोन्याच्या किमतीत मोठी वाढ झाली आहे. वर्षाच्या सुरुवातीलाच ८८,००० रुपये प्रति १० ग्रॅम चा टप्पा ओलांडणाऱ्या सोन्याने केवळ ५४ दिवसांत तब्बल ११,००० रुपयांची वाढ नोंदवली आहे. ही तेजी कायम राहणार का, सोन्याच्या किमती पुन्हा खाली येतील का, आणि गुंतवणूकदारांसाठी योग्य संधी कोणती, याचा आढावा घेऊया.

सोन्यात गुंतवणुकीसाठी कोणते पर्याय उपलब्ध?

गुंतवणुकीच्या दृष्टीने सोन्यामध्ये पैसे गुंतवण्यासाठी विविध प्लॅटफॉर्म उपलब्ध आहेत. प्रत्येक पर्याय गुंतवणूकदाराच्या आर्थिक उद्दिष्टे, जोखीम घेण्याची क्षमता आणि गुंतवणुकीचा कालावधी यावर अवलंबून असतो.

गोल्ड ETF (Exchange Traded Funds): जर गुंतवणूकदारांना तरलता हवी असेल आणि सोपी खरेदी-विक्री हवी असेल, तर हा पर्याय उत्तम ठरतो.
गोल्ड म्युच्युअल फंड: दीर्घकालीन गुंतवणुकीसाठी आणि नियमित गुंतवणुकीच्या उद्देशाने SIP (Systematic Investment Plan) चा पर्यायही उपलब्ध आहे.
फिजिकल गोल्ड: पारंपरिक स्वरूपात सोनं खरेदी करणाऱ्या गुंतवणूकदारांसाठी सोन्याचे दागिने, नाणी आणि बार्स हे पर्याय आहेत.

सोन्याच्या किंमतीत वाढीची कारणे

तज्ज्ञांच्या मते, जागतिक बाजारातील अस्थिरता आणि आर्थिक धोरणांमुळे सोन्याच्या किमतीत झपाट्याने वाढ झाली आहे.
१) जागतिक तणाव आणि अनिश्चितता: अमेरिका आणि चीनमधील व्यापार युद्ध, युक्रेन-रशिया संघर्ष आणि मध्य पूर्वेतील अस्थिरता यामुळे सोन्याची मागणी वाढली आहे.

२) अमेरिकेच्या धोरणांचा परिणाम: अमेरिकेचे राष्ट्राध्यक्ष डोनाल्ड ट्रम्प यांच्या व्यापार धोरणांमुळे जागतिक बाजारात अस्थिरता निर्माण झाली आहे, त्यामुळे गुंतवणूकदारांनी सुरक्षित पर्याय म्हणून सोन्याकडे वळाले

३) डॉलर आणि रुपयाचे मूल्य: फेडरल रिझर्व्हच्या व्याजदर धोरणांमुळे डॉलर मजबूत झाला, परिणामी रुपयाची घसरण झाली. याचा थेट परिणाम सोन्याच्या किंमतींवर झाला.

४) मध्यवर्ती बँकांची मोठी खरेदी: चीन आणि भारतासह अनेक देशांच्या मध्यवर्ती बँकांनी मोठ्या प्रमाणात सोनं खरेदी केल्याने त्याच्या किंमतींमध्ये वाढ झाली आहे.

गुंतवणूकदारांसाठी सावधगिरीचा सल्ला

तज्ज्ञांच्या मते, सोन्याच्या किमतींनी सध्या इक्विटी आणि बाँड मार्केटला मागे टाकले आहे. मात्र, या वाढीमुळे नवीन गुंतवणूकदारांनी थोडी सावधगिरी बाळगण्याची गरज आहे.

मोतीलाल ओसवाल फायनान्शियल सर्व्हिसेस चे वरिष्ठ विश्लेषक मानव मोदी यांच्या मते, सोन्याच्या किंमती झपाट्याने वाढत असल्यामुळे नवीन गुंतवणूक करताना योग्य काळजी घेणं आवश्यक आहे.

जागतिक अनिश्चितता आणि डॉलर-रुपया विनिमय दर यामुळे हा ट्रेंड पुढील काही काळ टिकून राहण्याची शक्यता आहे, मात्र अल्पकालीन नफा मिळवण्यासाठी गुंतवणूक करणाऱ्यांनी धोका ओळखावा.

सोन्याने विक्रमी वाढ कशी केली?

सोन्याच्या वाढीचे विश्लेषण करताना गेल्या साडेचार दशकांत झालेल्या किंमतीतील चढ-उतारांचा विचार करणे महत्त्वाचे आहे.
२०२४ हे वर्ष सोन्यासाठी ऐतिहासिक ठरले असून, ४५ वर्षांतील सर्वोच्च वाढ झाली आहे. यापूर्वी २००७ मध्ये ३१% वाढ झाली होती, तर १९७९ मध्ये तब्बल १३३% वाढ झाली होती. गेल्या वर्षी म्हणजेच २०२३ मध्ये सोन्याने ३०% परतावा दिला होता, तर २०२४ च्या पहिल्या दोन महिन्यांतच ११.२०% वाढ झाली आहे.

सोन्याच्या किंमती भविष्यात कशा राहतील?

सोन्याच्या किंमती भविष्यात मागणी आणि पुरवठ्यावर अवलंबून असतील.चीनमध्ये आर्थिक सुधारणा झाल्यास सोन्याची किंमत आणखी वाढू शकते. अमेरिकेच्या फेडरल रिझर्व्हच्या व्याजदर धोरणांवर परिणाम होईल. डॉलरच्या तुलनेत रुपयाच्या घसरणीचा परिणाम भारतीय बाजारावर होऊ शकतो.

गुंतवणूक करताना धोका विचारात घ्या

सोन्याच्या किमतीत सध्या मोठ्या प्रमाणावर वाढ झाली असली तरी, नवीन गुंतवणूकदारांनी सावधगिरी बाळगावी. दीर्घकालीन गुंतवणुकीसाठी सोनं हा चांगला पर्याय ठरू शकतो, परंतु सध्याच्या उच्च किमतींवर मोठ्या प्रमाणात गुंतवणूक करताना धोका विचारात घ्यावा. जागतिक परिस्थिती, डॉलरचे मूल्य आणि मध्यवर्ती बँकांचे धोरण यावर पुढील काही महिन्यांत सोन्याच्या किंमती ठरणार आहेत.