एकदाच घ्या FSSAI परवाना आणि बिजनेस वाढवा! किराणा दुकान, ढाबा, मेससाठी हा परवाना का हवा? वाचा नियम व फायदे

FSSAI Licence:- भारतात अन्न प्रक्रिया व्यवसाय सुरु करण्यासाठी अन्न सुरक्षा आणि मानके प्राधिकरण (FSSAI - Food Safety and Standards Authority of India) कडून परवाना घेणे अनिवार्य आहे. हा परवाना अन्न उत्पादन, प्रक्रिया, साठवणूक, वितरण, वाहतूक आणि विक्री करणाऱ्या सर्व व्यावसायिकांना घ्यावा लागतो. वैध परवान्याशिवाय अन्न व्यवसाय करणे कायद्याने गुन्हा मानला जातो आणि त्यामुळे व्यवसायावर मोठ्या प्रमाणात दंडात्मक कारवाई होऊ शकते. ग्राहकांच्या आरोग्याशी संबंधित असल्यामुळे अन्न सुरक्षा सुनिश्चित करणे अत्यंत महत्त्वाचे आहे. FSSAI परवाना घेतल्याने व्यवसाय अधिक विश्वासार्ह बनतो आणि ग्राहकांमध्ये त्याचा दर्जा टिकून राहतो.

FSSAI परवान्याचे तीन विभाग

FSSAI परवाना तीन प्रकारांमध्ये विभागलेला आहे. लहान व्यवसाय आणि किरकोळ विक्रेत्यांसाठी बेसिक नोंदणी आवश्यक असते, तर मोठ्या व्यवसाय आणि प्रक्रिया उद्योगांसाठी राज्य परवाना आणि केंद्रीय परवाना घ्यावा लागतो. लहान विक्रेते, रस्त्यावरील फूड स्टॉल्स, किराणा दुकानदार, लघुउद्योग किंवा घरगुती पदार्थ विकणाऱ्यांसाठी वार्षिक उलाढाल १२ लाख रुपयांपेक्षा कमी असेल,

तर त्यांना बेसिक नोंदणी पुरेशी असते. जर व्यवसायाची वार्षिक उलाढाल १२ लाखांपेक्षा जास्त आणि २० कोटींपर्यंत असेल, तर राज्य परवाना आवश्यक असतो. मोठ्या प्रमाणावर उत्पादन करणाऱ्या, आयात-निर्यात करणाऱ्या आणि आंतरराज्य व्यापार करणाऱ्या उद्योगांसाठी केंद्रीय परवाना घेणे बंधनकारक आहे.

कसा मिळवाल एफएसएसआय परवाना?

FSSAI ने फूड सेफ्टी कम्प्लायन्स सिस्टम (FoSCOS) नावाचे ऑनलाईन पोर्टल विकसित केले आहे, ज्या माध्यमातून कोणत्याही प्रकारचा अन्न प्रक्रिया व्यवसाय ऑनलाईन अर्ज करून परवाना मिळवू शकतो. अर्ज करण्यासाठी https://foscos.fssai.gov.in/ या अधिकृत वेबसाइटला भेट द्यावी लागते. अर्ज करण्यापूर्वी सर्व आवश्यक कागदपत्रे तयार ठेवणे महत्त्वाचे आहे.

यात व्यवसाय नोंदणी प्रमाणपत्र, जीएसटी क्रमांक, आधार किंवा पॅन कार्ड, उत्पादन यादी, पाणी चाचणी अहवाल, फूड सेफ्टी मॅनेजमेंट प्लॅन आणि भाडेपट्टी करारपत्र किंवा मालकी हक्क प्रमाणपत्र यांचा समावेश असतो. अर्ज सबमिट केल्यानंतर आवश्यक शुल्क भरावे लागते, जे परवान्याच्या श्रेणीनुसार बदलते. बेसिक नोंदणीसाठी वार्षिक १०० ते ५०० इतके शुल्क असते, राज्य परवान्यासाठी २,००० ते ५,००० आणि केंद्रीय परवान्यासाठी वार्षिक ७,५०० शुल्क लागते.

ऑनलाईन अर्ज सादर केल्यानंतर, तो संबंधित विभागाकडून पडताळणीसाठी पाठवला जातो. सर्व कागदपत्रे वैध असल्यास आणि आवश्यक अटी पूर्ण झाल्यास, FSSAI परवाना मंजूर केला जातो. हा परवाना १ ते ५ वर्षांपर्यंत वैध असतो, आणि तो वेळेत नुतनीकरण करणे बंधनकारक आहे. परवाना मुदत संपण्याच्या ३० दिवस आधी नुतनीकरणासाठी अर्ज करावा लागतो, अन्यथा व्यवसाय अवैध ठरू शकतो.

FSSAI परवाना घेण्याचे फायदे

कायदेशीर मान्यता मिळाल्याने व्यवसाय अधिक विश्वासार्ह ठरतो आणि ग्राहकांचा विश्वास वाढतो. मोठ्या कंपन्यांशी भागीदारी करण्यासाठी हा परवाना अनिवार्य असल्याने व्यवसायाच्या वाढीस मदत होते. आंतरराष्ट्रीय व्यापार करताना FSSAI परवाना असणे आवश्यक असल्याने निर्यातदार कंपन्यांसाठीही तो महत्त्वाचा ठरतो. हा परवाना घेतल्याने अन्न प्रक्रिया उद्योगांना गुणवत्ता नियंत्रण राखणे सोपे होते आणि त्यामुळे ब्रँड व्हॅल्यू वाढते.

अर्ज करताना अडचण आल्यास या ठिकाणी संपर्क साधा

अर्ज करण्याच्या प्रक्रियेत काही अडचणी आल्यास FoSCOS हेल्पडेस्क वर संपर्क साधता येतो. Helpline Number 1800 112 100 वर कॉल करून किंवा foscos@fssai.gov.in या ई-मेलवर मदतीसाठी चौकशी करता येते. ऑनलाईन पोर्टलचा वापर करून अर्ज स्थिती देखील ट्रॅक करता येते आणि आवश्यक कागदपत्रे जोडून अर्जाची प्रक्रिया जलद आणि सोपी करता येते.

FSSAI परवाना घेणे प्रत्येक अन्न प्रक्रिया व्यवसायासाठी आवश्यक आहे. यामुळे व्यवसाय कायदेशीर होतो आणि अन्न सुरक्षा नियमांचे पालन सुनिश्चित होते. परवाना न घेतल्यास कायदेशीर कारवाई होऊ शकते आणि व्यवसायाला मोठे नुकसान सहन करावे लागू शकते. त्यामुळे प्रत्येक उद्योजकाने आपला व्यवसाय सुरळीत आणि नियमांचे पालन करून चालवण्यासाठी वेळेत FSSAI परवाना घ्यावा आणि नुतनीकरण करावे.