Farming Success Stories : फक्त 1 एकर शेतीतून 11 लाखांचा नफा ! शेतकऱ्याच्या यशोगाथेने आमदारसुद्धा शेतात पोहोचले
Farming Success Stories : कृष्णकुमार जोगदंड यांनी पारंपरिक शेतीच्या चौकटीबाहेर विचार करत शेडनेटमधून आधुनिक शेती करण्याचा निर्णय घेतला आणि त्यातून मोठे यश मिळवले. परभणी जिल्ह्यातील सोनपेठ तालुक्यातील नरवाडी गावातील या प्रयोगशील शेतकऱ्याने एका एकर काकडी शेतीतून तब्बल ११ लाख रुपयांचे उत्पन्न मिळवले आहे.
शेतीतील आधुनिक तंत्रज्ञानाचा अवलंब करत त्यांनी काकडीच्या उत्पादनासंदर्भात राज्यभरातील विविध शेतकऱ्यांशी संवाद साधला. योग्य वाण निवड, खत व्यवस्थापन, सिंचन पद्धती, आणि औषधीय उपाय यांचा अभ्यास करून त्यांनी आपल्या शेतात तीन शेडनेट उभारले. यातील एका शेडनेटमध्ये एक एकर क्षेत्रावर काकडीची लागवड केली. याच प्रयोगशीलतेच्या जोरावर त्यांनी तब्बल ४३ टन काकडीचे उत्पादन घेतले.
उत्पन्न आणि नफा
काकडीच्या उत्पादनातून मोठ्या प्रमाणात लाभ मिळवण्यासाठी त्यांनी गुणवत्तापूर्ण उत्पादनावर भर दिला आणि त्याचा बाजारात चांगला दर मिळाला.
- १२ तोडे काढून विक्री केल्यानंतर त्यांना ११ लाखांचे उत्पन्न मिळाले.
- संपूर्ण हंगामासाठी त्यांनी केवळ २ लाख रुपयांचा खर्च केला.
- त्यामुळे एकूण निव्वळ नफा ९ लाख रुपये इतका झाला.
कोल्हापुरी बंधाऱ्याचा फायदा
कृष्णकुमार जोगदंड यांच्या शेताच्या शेजारी कोल्हापुरी पद्धतीचा बंधारा आहे, जो पावसाळ्यात भरून राहतो. या बंधाऱ्यातील पाण्यामुळे त्यांची इंधन विहीर सदैव भरलेली राहते, परिणामी त्यांना पाण्याच्या कमतरतेचा कधीच सामना करावा लागला नाही. मुबलक पाण्याच्या उपलब्धतेमुळे काकडीच्या शेतीसाठी योग्य सिंचन करता आले आणि उत्पादनात मोठी वाढ झाली.
नव्या पिकांचा प्रयोग
कृष्णकुमार जोगदंड यांनी तीन शेडनेट उभारले असून दोन शेडनेटमध्ये काकडी आणि एका शेडनेटमध्ये शिमला मिरचीचे उत्पादन घेत आहेत. यामुळे फक्त काकडीवर अवलंबून न राहता, विविध उत्पादनांचे व्यवस्थापन करत संपूर्ण वर्षभर उत्पन्नाचा स्त्रोत सुरू ठेवण्याची कल्पना त्यांनी अमलात आणली आहे.
आमदारांचा दौरा
जोगदंड यांच्या यशस्वी शेती प्रयोगाची माहिती मिळताच आमदार राजेश विटेकर यांनी त्यांच्या शेताला भेट दिली. त्यांनी शेडनेटमधील काकडी व शिमला मिरची उत्पादनाची पाहणी करून कृषी तंत्रज्ञानाच्या वापराची प्रशंसा केली. कृषी क्षेत्रात नवीन तंत्रज्ञान, सुधारित वाण, आणि योग्य व्यवस्थापनाचा अवलंब केल्यास शेती किफायतशीर आणि फायदेशीर ठरू शकते, हे कृष्णकुमार जोगदंड यांनी आपल्या यशाने सिद्ध केले आहे.
नव्या पिढीतील शेतकऱ्यांसाठी प्रेरणादायी
कृष्णकुमार जोगदंड यांची यशोगाथा नव्या पिढीतील शेतकऱ्यांसाठी प्रेरणादायी आहे. पारंपरिक शेतीला आधुनिक तंत्रज्ञानाची जोड दिल्यास उत्पन्नात मोठी वाढ करता येते आणि कमी क्षेत्रातही भरघोस नफा मिळवता येतो, हे त्यांनी दाखवून दिले. शेडनेट शेती, योग्य नियोजन, आणि पाण्याचा सुयोग्य वापर यामुळे कृषी क्षेत्रात आर्थिक स्थैर्य मिळवता येऊ शकते, हे जोगदंड कुटुंबाच्या यशाने स्पष्ट केले आहे.