🚜 शेतकऱ्यांनो, ऐकलंत का ? कृषी मंत्र्यांनी पीक विम्याबद्दल केले ‘हे’ धक्कादायक विधान!

Manikrao Kokate News : राज्यातील शेतकऱ्यांसाठी लागू करण्यात आलेल्या पीक विमा योजनेवर बोलताना कृषी मंत्री माणिकराव कोकाटे यांनी एक वादग्रस्त विधान केले आहे. "हल्ली भिकारीदेखील एक रुपया घेत नाही, पण आम्ही शेतकऱ्यांना एका रुपयात पीक विमा दिला. मात्र, काही लोकांनी त्याचा गैरवापर केला," असे ते म्हणाले. त्यांच्या या विधानावर आता चर्चा रंगण्याची शक्यता आहे.

पीक विमा योजनेंतर्गत गैरव्यवहार

माणिकराव कोकाटे यांनी स्पष्ट केले की, सरकारने शेतकऱ्यांना अत्यंत कमी दरात पीक विमा उपलब्ध करून दिला होता. मात्र, काही लोकांनी आणि विमा कंपन्यांनी या योजनेचा गैरफायदा घेतल्याने गैरव्यवहाराचे प्रकार समोर आले. त्यामुळे सरकार आता या योजनेत काही महत्त्वपूर्ण सुधारणा करण्याच्या विचारात आहे.

त्यांनी सांगितले की, "पीक विमा योजनेसंदर्भात सरकारला चांगले आणि वाईट दोन्ही प्रकारचे अनुभव आले आहेत. मात्र, कोणत्याही परिस्थितीत ही योजना बंद केली जाणार नाही. त्याऐवजी तिच्यात आवश्यक बदल करण्यात येतील, जेणेकरून खरी गरज असलेल्या शेतकऱ्यांना या योजनेचा लाभ मिळू शकेल."

४ लाख अर्ज नामंजूर 

कृषी मंत्र्यांनी सांगितले की, सध्या पीक विम्यासाठी दाखल झालेल्या ४ लाख अर्जांना नामंजुरी मिळाली आहे. यामागे अर्जदार आणि विमा एजन्सी चालकांची काही त्रुटी असू शकतात. त्यावर चौकशी सुरू असून योग्य ती कारवाई केली जाईल, असे त्यांनी स्पष्ट केले.

याचबरोबर, कृषी विभागात अधिकारी आणि कर्मचाऱ्यांची मोठी कमतरता असल्याचेही त्यांनी अधोरेखित केले. त्यामुळे लवकरच भरती करण्याची योजना आखली जात आहे. याशिवाय, शेतकऱ्यांना कृषी विभागाशी थेट संपर्क साधता यावा यासाठी एका विशेष क्रमांकाची व्यवस्था करण्याचा विचार सरकार करत आहे.

शेतकऱ्यांसाठी पीक विमा योजना सुरूच

माणिकराव कोकाटे यांनी पुन्हा एकदा स्पष्ट केले की, पीक विमा योजना बंद करण्याचा सरकारचा कोणताही विचार नाही. मात्र, योजनेत सुधारणा करून अधिक पारदर्शकता आणली जाईल. मुख्यमंत्री आणि उपमुख्यमंत्र्यांसोबतच्या चर्चेनंतर यासंदर्भात अंतिम निर्णय घेतला जाईल.

या संपूर्ण प्रकरणामुळे शेतकऱ्यांमध्ये संभ्रम निर्माण झाला असला, तरी सरकार शेतकऱ्यांच्या हिताचा विचार करूनच निर्णय घेईल, असा विश्वास त्यांनी व्यक्त केला आहे.