Farmer Success Story: फक्त 7 मिनिटात 1 एकर फवारणी! पुण्यातील तरुणांनी बनवलं भन्नाट ड्रोन

Farmer Success Story:- शेतीमध्ये आधुनिक तंत्रज्ञानाचा वापर वेगाने वाढत असून, शेतकरीही पारंपरिक शेतीला या नव्या तंत्रज्ञानाची जोड देत आहेत. याच पार्श्वभूमीवर पुण्यातील चार तरुणांनी मिळून एक अत्याधुनिक शेती ड्रोन तयार केले आहे, ज्याच्या मदतीने अवघ्या सात मिनिटांत एक एकर क्षेत्राची फवारणी करता येते. ऋषिकेश राणे, विशाल पाटील,

सारंग माने आणि प्रणव राजपूत या चौघांनी मिळून ‘कृषी उडान’ स्टार्टअप सुरू केले असून, या अंतर्गत त्यांनी हे ड्रोन विकसित केले आहे. पारंपरिक पद्धतीने फवारणी करण्यासाठी मोठा वेळ आणि मजुरी खर्च लागतो, तसेच फवारणी करणाऱ्या व्यक्तीला विषारी रसायनांच्या थेंबांचा धोका संभवतो. हे सर्व टाळण्यासाठी आधुनिक तंत्रज्ञानाचा उपयोग करून अधिक कार्यक्षम आणि किफायतशीर उपाय शोधण्याच्या उद्देशाने त्यांनी हे ड्रोन विकसित केले आहे.

कसा आहे हा कृषी उडान ड्रोन?

कृषी उडान ड्रोनमध्ये सहा मोटारी असून, त्यामुळे ते स्थिर आणि अचूक फवारणी करू शकते. या ड्रोनला रिमोट कंट्रोलच्या मदतीने सहज नियंत्रित करता येते, त्यामुळे शेतकऱ्यांना शेतात जाऊन फवारणी करण्याची गरज पडत नाही. या ड्रोनमध्ये दहा लिटर द्रावण साठवण्याची क्षमता असून, एका दिवसात 30 ते 40 एकर शेतीची फवारणी करण्याची क्षमता आहे.

तसेच, हे ड्रोन 300 ते 400 फूट उंच उडू शकते आणि एका ठिकाणाहून दोन किलोमीटरपर्यंत नियंत्रित करता येऊ शकते. त्यामुळे मोठ्या शेतजमिनींसाठीही हे ड्रोन अत्यंत उपयुक्त ठरते. हे ड्रोन वापरल्यामुळे पारंपरिक फवारणीच्या तुलनेत वेळ, श्रम आणि पाण्याची मोठी बचत होते.

किती आहे या ड्रोनची किंमत?

या अत्याधुनिक ड्रोनची किंमत सुमारे 3.5 लाख रुपयांपासून पुढे असून, त्याच्या विविध वैशिष्ट्यांनुसार किंमत बदलू शकते. मात्र, शेतकऱ्यांना हे तंत्रज्ञान परवडावे म्हणून राज्य सरकारकडून अनुदानाचीही तरतूद आहे. महाडीबीटी पोर्टलवर अर्ज करून शेतकरी अनुदान मिळवू शकतात, त्यामुळे कमी खर्चात हे ड्रोन खरेदी करण्याची संधी उपलब्ध आहे. मात्र, हे ड्रोन वापरण्यासाठी विशेष पायलट परवाना आवश्यक असून, योग्य प्रशिक्षण घेतल्यानंतरच त्याचा वापर करता येतो. त्यामुळे शेतकऱ्यांनी याचा वापर करताना आवश्यक नियमांचे पालन करावे लागते.

‘कृषी उडान’ स्टार्टअपचा मुख्य कार्यालय पुण्यातील औंध येथे असून, संस्थापकांनी हे तंत्रज्ञान महाराष्ट्रभर पोहोचवण्याचा संकल्प केला आहे. पारंपरिक पद्धतीने फवारणी करताना लागणारा वेळ आणि खर्च मोठा असल्याने अनेक शेतकरी त्यासाठी आधुनिक पर्याय शोधत आहेत. हे ड्रोन वापरल्यास कमी खर्चात अधिक कार्यक्षम पद्धतीने फवारणी करता येईल.

मजुरीवरील खर्च वाचेल, विषारी रसायनांच्या संपर्कात येण्याचा धोका कमी होईल आणि शेतीसाठी कीटकनाशकांचा अचूक प्रमाणात वापर करता येईल. त्यामुळे हे ड्रोन शेतकऱ्यांसाठी एक मोठा गेमचेंजर ठरू शकते. शेतीमध्ये आधुनिक तंत्रज्ञानाचा वापर वाढवण्याच्या दिशेने हे एक मोठे पाऊल असून, भविष्यात शेती अधिक प्रगत आणि प्रभावी होण्यास मदत होईल.