घर आहे, पण दुसरं घ्यायचंय? CIDCO चा नवा निर्णय लवकरच… ‘या’ नियमात होणार मोठा बदल

Cidco Lottery 2025:- सिडकोच्या महागृहनिर्माण योजनेसाठी जाहीर करण्यात आलेल्या लॉटरीला अपेक्षित प्रतिसाद मिळालेला नाही. विशेषतः नवी मुंबईसारख्या ठिकाणी जिथे म्हाडाच्या घरांसाठी मोठी मागणी असते, तिथेच सिडकोच्या घरांना नागरिकांनी पाठ फिरवली आहे. या घरांच्या किंमती खासगी बिल्डरच्या घरांपेक्षा अधिक असल्याने लोकांमध्ये नाराजी आहे.

सिडकोने जवळपास 26,000 घरांची लॉटरी काढली होती, पण अनेकांना घर मिळूनही त्यांनी त्याकडे दुर्लक्ष केलं. आता शासकीय आणि निमशासकीय कर्मचारी तसेच महावितरण, मुंबई महापालिका आणि पोलीस विभागातील कर्मचाऱ्यांनीही या घरांना नकार दिला आहे. परिणामी, सिडकोसमोर मोठ्या संख्येने बांधण्यात आलेली घरं विकायची कशी, हा प्रश्न उभा राहिला आहे.

सिडकोच्या घरांच्या किमती जास्त?

सिडकोच्या घरांच्या किंमती खासगी बिल्डरच्या तुलनेत अधिक असल्याचा आरोप नागरिक करत आहेत. अनेकदा सरकारी योजना अधिक परवडणाऱ्या असतात, पण या प्रकरणात मात्र उलट चित्र दिसून येत आहे. त्यामुळेच नवी मुंबईकरांनी या घरांना नकार दिला आहे. सध्या सिडकोच्या 7500 घरं विक्रीविना पडून आहेत. ही घरे विकली जात नसल्याने सिडकोच्या हजारो कोटी रुपयांची रक्कम अडकून पडली आहे. त्यामुळे आता सिडको यावर काय उपाययोजना करते, याकडे सगळ्यांचे लक्ष लागले आहे.

सिडकोचे काय आहेत नियम?

सिडकोच्या सध्याच्या नियमांनुसार, नवी मुंबईत घर असलेल्यांना दुसरं घर घेता येत नाही. मात्र, हा नियम अनेकांसाठी अडचणीचा ठरत आहे. कुटुंब वाढल्यानंतर दुसरं घर आवश्यक ठरू शकतं, पण हा नियम असल्याने अनेकांना अर्ज करता येत नाही. यामुळेच सिडको आता हा नियम शिथिल करण्याच्या तयारीत असल्याची चर्चा आहे. सिडकोचे अध्यक्ष संजय शिरसाट यांनी यासंदर्भात महत्त्वाचे संकेत दिले असून, लवकरच या मुद्द्यावर अंतिम निर्णय होईल. जर हा नियम बदलला गेला, तर नवी मुंबईत घर असतानाही दुसरं घर घेण्याची संधी नागरिकांना मिळेल.

सध्या सिडकोच्या घरांच्या किंमतीत काही प्रमाणात कपात करण्याच्या शक्यताही वर्तवण्यात येत आहे. नागरिकांना आकर्षित करण्यासाठी आणि विक्री वाढवण्यासाठी सिडको काही सवलती जाहीर करेल, अशी शक्यता आहे. जर किंमती कमी केल्या गेल्या आणि नियम शिथिल केले गेले, तर सिडकोच्या घरांसाठी नागरिकांकडून चांगला प्रतिसाद मिळू शकतो. मात्र, हे प्रत्यक्षात कितपत अमलात आणलं जातं, हे पाहणं महत्त्वाचं ठरणार आहे.