CCI ने पुन्हा कापूस खरेदी सुरू केली! शेतकऱ्यांना हमीभाव मिळेल का? जाणून घ्या बाजारपेठेतील ताजे अपडेट्स

CCI Kapus Kharedi:- भारतीय कापूस महामंडळ (सीसीआय) ची कापूस खरेदी पुन्हा सुरू झाली असून, अमरावती जिल्ह्यातील केंद्रांवर शुक्रवारी (२८ फेब्रुवारी) ४ हजार क्विंटलची आवक नोंदवण्यात आली आहे. ही खरेदी आणखी आठवडाभर चालण्याची शक्यता असून, शेतकऱ्यांनी मोठ्या प्रमाणावर आपल्या साठवलेल्या कापसाची विक्री सुरू केली आहे.

खरिपातील कापसाचा हंगाम जवळपास संपत आला असून, मागील काही आठवड्यांपासून खरेदी बंद असल्याने शेतकरी चिंतेत होते. सीसीआयने याआधी तांत्रिक कारण सांगून खरेदी थांबवली होती. अधिकृतरीत्या पोर्टलमध्ये अडचणी असल्याचे सांगण्यात आले, मात्र प्रत्यक्षात केंद्रांवर येणाऱ्या कापसाची प्रत आणि उतारा कमी असल्यामुळे खरेदी रोखण्यात आल्याचे स्पष्ट झाले. यामुळे अनेक शेतकऱ्यांना त्यांच्या कापसाला योग्य दर मिळण्यात अडचणी आल्या.

कापसाच्या पहिल्या आणि दुसऱ्या वेच्यानंतर बाजारात फरदळ प्रतीचा कापूस येतो, ज्याची सीसीआय खरेदी करत नाही. पहिल्या वेच्यातील चांगल्या प्रतीच्या कापसाची खरेदी करताना दुसऱ्या वेच्यातील कापसाचे हमीभाव सीसीआयने १०० रुपयांनी कमी केले होते. हमीभावाच्या तुलनेत खुल्या बाजारातील दर कमी असल्यामुळे शेतकऱ्यांनी सुरुवातीला सीसीआयलाच प्राधान्य दिले.

पहिल्या वेच्यातील बहुतांश कापूस सीसीआयने हमीदराने खरेदी केल्याने खासगी बाजारातील उलाढाल ठप्प झाली होती. परिणामी जिल्ह्यातील निम्म्याहून अधिक जिनिंग-प्रेसिंग यंत्रे बंद पडली. काही जिनिंग केंद्रे सीसीआयने भाडेतत्त्वावर घेतली आणि तिथेच गाठी बांधण्यात आल्या. त्यामुळे व्यापाऱ्यांचा बाजारातील प्रभाव कमी झाला आणि त्यांना कापूस खरेदीसाठी अधिक प्रयत्न करावे लागले.

सीसीआयने खरेदी थांबवली तेव्हा व्यापाऱ्यांनी घेतला फायदा

दुसऱ्या वेच्यातील काही प्रमाणात कापूस व्यापाऱ्यांनी खरेदी केला असला तरी, सीसीआयने खरेदी थांबवलेली असल्याने व्यापाऱ्यांनी या संधीचा फायदा घेतला. त्यांनी शेतकऱ्यांकडून खरेदी करताना प्रतिक्विंटल दोन किलोपर्यंत रुईचा उतारा कमी असल्याचे सांगून दर कपात केली. सीसीआयला ३४ किलोपर्यंत रुईचा उतारा आवश्यक असतो,

परंतु काही शेतकऱ्यांच्या कापसाचा उतारा ३८ किलोपर्यंत गेला असूनही दरात वाढ करण्यात आली नाही. त्यामुळे अनेक शेतकऱ्यांना आर्थिक नुकसान सहन करावे लागले. व्यापाऱ्यांनी कापूस खरेदी करताना वजनात कपात करण्याचा प्रयत्न केल्याने शेतकऱ्यांमध्ये असंतोष निर्माण झाला आहे. त्यामुळे आता कापूस विक्री करताना शेतकऱ्यांनी सतर्क राहणे गरजेचे आहे.

घरात साठवून ठेवलेला कापूस आता विक्रीला

सीसीआयने पुन्हा खरेदी सुरू केल्याने शेतकऱ्यांनी घरात साठवून ठेवलेला कापूस बाजारात आणण्यास सुरुवात केली आहे. मात्र, शिल्लक कापसाचे प्रमाण तुलनेत कमी असल्यामुळे ही खरेदी फार काळ चालणार नाही. अनेक शेतकऱ्यांनी या संधीचा लाभ घेत आपल्या साठवलेल्या कापसाची विक्री सुरू केली आहे.

व्यापारी अजूनही झडती घेत खरेदी करत असून, दर ठरवताना एक ते दोन किलोपर्यंत कट्टी कापत असल्याचे शेतकऱ्यांनी सांगितले. त्यामुळे शेतकऱ्यांनी आपला कापूस विकताना विशेष काळजी घ्यावी, अन्यथा त्यांना अपेक्षित दर मिळण्यात अडचण येऊ शकते. सध्या बाजारात चांगल्या प्रतीच्या कापसाला मागणी असून, शेतकऱ्यांनी त्यानुसार आपल्या कापसाचे योग्य नियोजन करणे गरजेचे आहे.