Cabbage Cultivation: 9 लाखांचा फायदा… तोही फक्त 65 दिवसात! शेतकऱ्याचा भन्नाट प्रयोग.. जाणून घ्या यशाचा फॉर्मुला

Farmer Success Story:- आजच्या काळात अनेक तरुण सरकारी किंवा खासगी नोकरीच्या मागे धावतात आणि त्यासाठी आपले अनेक वर्ष वाया घालवतात. नोकरी म्हणजे एका ठराविक चौकटीत अडकलेले जीवन. मात्र, बुलढाणा जिल्ह्यातील संग्रामपूर तालुक्यातील रुधाणा गावातील समाधान उकळकार यांनी या चौकटीबाहेर जाऊन एक वेगळा मार्ग निवडला. त्यांनी नोकरीला पर्याय म्हणून शेती स्वीकारली आणि आधुनिक शेती तंत्रज्ञानाचा वापर करून नवा आदर्श निर्माण केला.

समाधान उकळकार यांनी बीए आणि डीएड शिक्षण घेतल्यानंतर खेर्डा गावातील एका शाळेत शिक्षक म्हणून नोकरी मिळवली. मात्र, त्यांचे मन नोकरीत रमले नाही. त्यांना शेतीत अधिक संधी दिसू लागली आणि त्यांनी मोठा निर्णय घेत नोकरीचा राजीनामा दिला. शेतीत मेहनत, नवे प्रयोग आणि आधुनिक तंत्रज्ञानाचा वापर करून अधिकाधिक उत्पादन मिळवण्याचा त्यांचा दृढ निश्चय होता. आज त्यांच्या या धाडसी निर्णयामुळेच ते यशस्वी शेतकरी बनले आहेत.

६५ दिवसांत ९ लाखांचे उत्पन्न! कोबीची अनोखी लागवड

शेतीत नवनवीन प्रयोग करण्याच्या वृत्तीमुळे समाधान उकळकार यांनी केळीच्या शेतात आंतरपीक म्हणून पत्ता कोबीची लागवड केली. विशेष म्हणजे, अवघ्या ६५ दिवसांत त्यांनी २.५ एकर जमिनीतून तब्बल ९ लाख रुपयांचे उत्पन्न मिळवले.

कसा झाला फायदा?

कोबी लागवडीसाठी केवळ १.५ लाख रुपये खर्च आला.खर्च वजा जाता ७ लाख रुपयांचा निव्वळ नफा मिळाला.आंतरपीक तंत्रज्ञानाचा वापर करून त्यांनी एकाच वेळी दोन पीक घेतले, ज्यामुळे शेती अधिक फायदेशीर झाली.ही पद्धत अनेक शेतकऱ्यांसाठी मार्गदर्शक ठरू शकते. एका जमिनीतून एकाच वेळी दोन पीक घेतल्याने अधिक फायदा होतो आणि जमीनही अधिक उपयुक्त ठरते.

ऊस शेतीतून कोट्यवधींचे उत्पन्न!

शेतीत आणखी मोठा प्रयोग करत समाधान उकळकार यांनी ऊस शेतीकडेही लक्ष केंद्रित केले. त्यांच्याकडे ५.५ एकर जमीन असून, त्यातील ४ एकरांवर ऊस लागवड केली आहे.

ऊस शेतीचे यशस्वी मॉडेल

त्यांनी घेतलेल्या ऊस पिकाची उंची १५ ते १८ फूट पर्यंत पोहोचली आहे.कृषी विभागाच्या मार्गदर्शनाखाली आणि आधुनिक तंत्रज्ञानाचा वापर करून ते १७ ते १८ लाख रुपयांचे उत्पन्न मिळवण्याच्या तयारीत आहेत.योग्य नियोजन आणि रात्रंदिन मेहनतीमुळे ऊस शेतीतही त्यांना मोठा नफा मिळण्याची अपेक्षा आहे.ऊस शेतीसोबतच ते आंतरपीक तंत्रज्ञानाचा वापर करत अधिक फायदेशीर उत्पादन मिळवत आहेत.

ड्रायझोन भागात शेतीचा यशस्वी प्रवास!

समाधान उकळकार यांच्या यशामागे फक्त मेहनत नाही तर योग्य नियोजन आणि तंत्रज्ञानाचाही मोठा वाटा आहे. २० वर्षांपूर्वी हा संपूर्ण भाग ड्रायझोन (कोरडवाहू क्षेत्र) म्हणून ओळखला जात होता. गावात पिण्यासाठी सुद्धा पाणी नव्हते, त्यामुळे शेती करणे अत्यंत कठीण होते. मात्र, चोंढी प्रकल्पामुळे जमिनीतील पाण्याची पातळी वाढली आणि याचा योग्य फायदा घेत समाधान उकळकार यांनी आपल्या शेतीचे संपूर्ण नियोजन बदलले.

शेतीतील महत्त्वपूर्ण बदल

आज त्यांच्या ५.५ एकर जमिनीत मुबलक पाणी उपलब्ध असून केळीची लागवड करण्यात आली आहे.अधिक फायदा मिळवण्यासाठी आंतरपीक तंत्रज्ञानाचा वापर करून कोथिंबिरीची लागवड करणार आहेत.सावलीसाठी बोरूच्या झाडांची लागवड केली जाणार आहे, जी पुढे खतासाठीही उपयुक्त ठरणार आहे.
समाधान उकळकार यांच्या मेहनतीने आणि आधुनिक विचारसरणीने एका कोरडवाहू भागात सिंचित शेती फुलवली आणि आज त्या भागाचा संपूर्ण कायापालट झाला आहे.