भारतीय रेल्वेच्या इतिहासात नवा विक्रम! पहिल्या Bullet ट्रेनसाठी उभारला जात आहे 200 मीटर स्टील पूल.. प्रवास होणार वेगवान

Bullet Train:- मुंबई-अहमदाबाद बुलेट ट्रेन प्रकल्पासाठी उभारण्यात येणाऱ्या २०० मीटर लांबीच्या स्टील पूलाच्या कामाला वेग आला आहे. भारतातील पहिल्या हाय-स्पीड रेल्वेसाठी आवश्यक असलेल्या पायाभूत सुविधांच्या उभारणीचा हा एक महत्त्वाचा टप्पा असून, यामुळे या प्रकल्पाच्या प्रगतीला चालना मिळणार आहे. संपूर्ण ५०८ किलोमीटर लांबीच्या या बुलेट ट्रेन मार्गावर अत्याधुनिक आणि सुरक्षिततेच्या दृष्टीने मजबूत अशा विविध संरचना उभारल्या जात आहेत, ज्यामध्ये पुलांसह, बोगदे, उड्डाणपूल आणि स्टेशन इत्यादींचा समावेश आहे. या प्रकल्पात एकूण १२ स्थानके असून, त्यातील ३५२ किलोमीटर भाग गुजरातमध्ये आणि १५६ किलोमीटर महाराष्ट्रात आहे.

कसा आहे हा स्टील पूल

यातील नाडियाजवळील राष्ट्रीय महामार्ग-४८ वर २०० मीटर लांबीचा स्टील पूल उभारला जात असून, त्यात प्रत्येकी १०० मीटर लांबीचे दोन स्वतंत्र स्पॅन असतील. हा पूल १४.३ मीटर रुंद आणि १४.६ मीटर उंच असून, त्याचे एकूण वजन सुमारे १५०० मेट्रिक टन आहे. या पूलासाठी लागणाऱ्या स्टील गर्डर्स उत्तर प्रदेशातील हापूरमधील सालासर वर्कशॉपमध्ये तयार करण्यात आल्या असून, त्यांची मजबुती आणि टिकाऊपणा विशेष लक्षात घेऊन त्यांचे डिझाईन करण्यात आले आहे.

हाय-स्पीड रेल्वेसाठी स्टील पूल अधिक सुरक्षित मानले जातात, कारण ते उच्च वेगाने धावणाऱ्या गाड्यांचा भार सहज पेलू शकतात. त्यामुळे या प्रकल्पात एकूण २८ स्टील पूल उभारण्याचे नियोजन करण्यात आले असून, त्यापैकी ११ पूल महाराष्ट्रात आणि १७ गुजरातमध्ये बांधले जाणार आहेत. आतापर्यंत गुजरातमध्ये सहा स्टील पूल पूर्ण झाले आहेत, ज्यामध्ये रेल्वे ट्रॅक, महामार्ग आणि औद्योगिक क्षेत्रांवरील पूलांचा समावेश आहे. हा बुलेट ट्रेन मार्ग ३२० किलोमीटर प्रतितास वेगाने धावण्यासाठी डिझाइन करण्यात आला आहे, त्यामुळे या पुलांच्या बांधणीमध्ये विशेष दक्षता घेतली जात आहे.

मेक इन इंडिया अंतर्गत होत आहे या पुलाची निर्मिती

हा संपूर्ण पूल "मेक इन इंडिया" उपक्रमांतर्गत तयार करण्यात येत असून, यामुळे भारताच्या तंत्रज्ञान आणि अभियांत्रिकी कौशल्याचे दर्शन होणार आहे. बुलेट ट्रेनसाठी हा पूल भारतातील रेल्वे क्षेत्रातील एक मोठी उपलब्धी ठरणार असून, यामुळे देशाच्या पायाभूत सुविधा क्षेत्राला नवी दिशा मिळेल. या प्रकल्पातील पहिल्या स्टील स्पॅनचे काम मार्च २०२५ मध्ये सुरू होणार असून, ऑगस्ट २०२५ पर्यंत संपूर्ण पूल उभारण्याचे उद्दिष्ट ठेवण्यात आले आहे.

पुलाच्या मजबुतीसाठी विशेष तंत्रज्ञानाचा वापर करण्यात येत असून, त्यामध्ये अॅडव्हान्स्ड स्टील स्ट्रक्चरल डिझाईनचा समावेश आहे. यामुळे केवळ गतीमान प्रवासाची सोयच नाही, तर सुरक्षिततेच्या दृष्टीनेही हा प्रकल्प एक आदर्श ठरणार आहे. भविष्यात भारतात जपानी तंत्रज्ञानाच्या साहाय्याने उभारण्यात येणाऱ्या बुलेट ट्रेन मार्गांसाठी हा प्रकल्प एक प्रेरणादायी उदाहरण ठरेल.