Alfred Cyclone: चक्रीवादळ ‘अल्फ्रेड’चा तडाखा! हवामान विभागाचा गंभीर इशारा

Alfred Cyclone:- ऑस्ट्रेलियाच्या पूर्व किनाऱ्यावर धडकणारे ‘अल्फ्रेड’ चक्रीवादळ हे मागील पाच दशकांतील सर्वात विध्वंसक चक्रीवादळ ठरण्याची शक्यता असून, यामुळे मोठ्या प्रमाणावर जीवित आणि वित्तहानी होण्याची भीती व्यक्त केली जात आहे. हवामानशास्त्रज्ञांनी दिलेल्या माहितीनुसार, हे चक्रीवादळ ताशी 95 ते 100 किमी प्रतितास वेगाने किनाऱ्यावर धडकणार आहे आणि त्याच्या परिणामामुळे प्रचंड मुसळधार पाऊस, जोडीला समुद्रात प्रचंड उंच लाटा आणि वादळी वाऱ्यांचा तडाखा बसणार आहे.

विशेष म्हणजे, ऑस्ट्रेलियातील ब्रिस्बेनसह क्वीन्सलँड आणि न्यू साउथ वेल्सच्या काही भागांना या चक्रीवादळाचा सर्वाधिक फटका बसणार आहे. त्यामुळे प्रशासनाने तातडीने रेड अलर्ट जारी केला असून, किनारी भागात राहणाऱ्या 25 लाखांहून अधिक लोकांना सुरक्षित स्थळी हलवण्याचे मोठ्या प्रमाणावर प्रयत्न सुरू आहेत.

काय आहे हवामान विभागाचा अंदाज?

हवामान विभागाच्या अंदाजानुसार, चक्रीवादळ किनाऱ्यावर धडकल्यानंतर समुद्रात लाटांची उंची 12.3 मीटरपर्यंत पोहोचण्याची शक्यता आहे, जी प्रचंड विध्वंस घडवू शकते. यामुळे किनारपट्टी भागांत पूरस्थिती निर्माण होऊ शकते, तसेच समुद्राच्या पाण्याची पातळी वाढल्याने अनेक ठिकाणी पाणी घरांमध्ये शिरण्याची भीती आहे.

दरम्यान, प्रशासनाने मदत व बचावकार्य जलदगतीने राबवण्यासाठी आपत्ती व्यवस्थापन दल, नौदल आणि हवाई दलाच्या विशेष पथकांची तैनाती केली आहे. अनेक ठिकाणी वीजपुरवठा पूर्णपणे खंडित करण्यात आला असून, सुरक्षिततेच्या कारणास्तव दूरसंचार सेवा देखील तात्पुरत्या बंद करण्यात आल्या आहेत. परिणामी, हजारो लोक अंधारात राहण्यास मजबूर झाले असून, आपत्कालीन परिस्थितीत संपर्क करणे कठीण झाले आहे.

प्रशासनाने सुरू केल्या तातडीच्या उपायोजना

चक्रीवादळाचा प्रभाव अधिक तीव्र होण्याआधीच प्रशासनाने तातडीने उपाययोजना सुरू केल्या आहेत. किनारपट्टी भागात राहणाऱ्या नागरिकांना स्थलांतर करण्याचे आदेश देण्यात आले असून, सुरक्षित आश्रयस्थळी जाण्यास सांगण्यात आले आहे. तसेच, नागरिकांना घरी राहण्याच्या सूचना देत, शक्य असल्यास बाहेर न पडण्याचे आवाहन करण्यात आले आहे. शाळा, महाविद्यालये, कार्यालये आणि व्यावसायिक प्रतिष्ठाने तात्पुरती बंद करण्यात आली आहेत. तसेच, हवाई वाहतूकही मोठ्या प्रमाणावर बाधित झाली असून, अनेक विमानसेवा रद्द करण्यात आल्या आहेत.

ऑस्ट्रेलियाच्या सरकारने आणि आपत्ती व्यवस्थापन पथकांनी परिस्थितीवर सतत लक्ष ठेवले असून, संभाव्य धोक्याचा सामना करण्यासाठी सर्व उपाययोजना केल्या जात आहेत. नागरिकांनी कोणत्याही अफवांना बळी न पडता प्रशासनाने दिलेल्या मार्गदर्शक सूचना काटेकोरपणे पाळाव्यात, असे आवाहन करण्यात आले आहे.

हवामान विभागाच्या ताज्या अहवालानुसार, चक्रीवादळाचे स्वरूप पुढील काही तासांत अधिक तीव्र होण्याची शक्यता असून, त्यामुळे संभाव्य हानी रोखण्यासाठी प्रशासन आणखी सतर्क झाले आहे. मदतकार्य वेगाने सुरू असून, आवश्यक ती मदत पुरवण्यासाठी सरकारकडून विशेष निधी जाहीर करण्यात येण्याची शक्यता आहे. ऑस्ट्रेलियातील नागरिकांनी आपली काळजी घ्यावी आणि सुरक्षित स्थळी आश्रय घ्यावा, असे हवामान विभागाने आवर्जून सांगितले आहे.