Agriculture News: शेतकऱ्यांनो, चुकीच्या किमतीत खते विकणाऱ्यांपासून सावध… IFFCO स्पष्ट केले नॅनो खतांचे दर

Agriculture News:- इंडियन फार्मर्स फर्टिलायझर्स को-ऑपरेटिव्ह लिमिटेड (IFFCO) यांनी त्यांच्या नॅनो खतांची बेकायदेशीर आणि अधिकृत दरापेक्षा कमी किमतीत विक्री करणाऱ्या ऑनलाइन प्लॅटफॉर्मविरोधात कायदेशीर कारवाई सुरू केली आहे. केंद्र सरकारच्या "खत नियंत्रण आदेश" नुसार, केवळ अधिकृत प्रमाणपत्र (O Certificate) धारक विक्रेत्यांनाच ही खते विक्री करण्याची परवानगी आहे.

मात्र, काही ऑनलाइन प्लॅटफॉर्म कोणतेही प्रमाणपत्र नसताना किंवा ‘इफ्को’ने अधिकृत न केलेले असूनही अत्यल्प साठा बाजारातून खरेदी करून किंवा इतर मार्गांनी प्राप्त करून अनधिकृतपणे विक्री करत आहेत. हे खते अधिकृत दरापेक्षा कमी किंमतीत विकण्याचा प्रयत्न करत असून, हे पूर्णपणे बेकायदेशीर असल्याचे ‘इफ्को’ने स्पष्ट केले आहे.

अशा बेकायदेशीर विक्रीमुळे शेतकऱ्यांची दिशाभूल होते आणि त्यांना गुणवत्तापूर्ण खते मिळण्याची खात्री राहत नाही, ज्याचा थेट परिणाम शेती उत्पादनावर होतो. त्यामुळे शेतकऱ्यांनी केवळ अधिकृत विक्रेत्यांकडूनच खते खरेदी करावीत, असे आवाहन ‘इफ्को’च्या वतीने करण्यात आले आहे. यासोबतच, कोणत्याही प्रकारच्या अनधिकृत विक्रीवर कायदेशीर कारवाई केली जाईल, असा इशाराही देण्यात आला आहे.

केंद्र शासनाचा खत नियंत्रण आदेश काय?

केंद्र शासनाच्या खत नियंत्रण आदेशानुसार, 100 रुपये किंवा त्याहून अधिक किमतीच्या खतांच्या विक्रीसाठी नोंदणीकृत दस्तऐवज असणे बंधनकारक आहे. नॅनो खतांची विक्री करताना केवळ अधिकृत विक्रेत्यांनाच ही परवानगी आहे. ‘इफ्को’ने स्पष्ट केले आहे की, कोणत्याही ऑनलाइन प्लॅटफॉर्मवर अधिकृत परवानगीशिवाय नॅनो खते विकल्यास त्यांच्यावर कठोर कारवाई केली जाईल. शेतकऱ्यांनी त्यांच्या फायद्यासाठी आणि योग्य खते मिळविण्यासाठी अधिकृत विक्रेत्यांकडूनच खरेदी करावी.

इफ्कोने जारी केलेले अधिकृत दर

‘इफ्को’ने जारी केलेल्या अधिकृत दरांनुसार, नॅनो युरिया विक्रेत्यासाठी 204 रुपये प्रति 500 मि.ली. बॉटल असून शेतकऱ्यांसाठी जास्तीत जास्त विक्री दर 225 रुपये निश्चित करण्यात आला आहे. नॅनो डीएपी साठी विक्रेत्यांना 547.50 रुपये प्रति 500 मि.ली. बॉटल दर लागू आहे, तर शेतकऱ्यांसाठी हा दर 600 रुपये निश्चित करण्यात आला आहे. काही ऑनलाइन विक्रेते अत्यल्प साठा जमा करून तो अवास्तव दरात विकण्याचा प्रयत्न करत आहेत, जो संपूर्णपणे बेकायदेशीर आहे.

त्यामुळे शेतकऱ्यांनी कोणत्याही प्रकारच्या आकर्षक सवलतीला बळी न पडता अधिकृत विक्रेत्यांकडूनच खरेदी करावी. ‘इफ्को’ने स्पष्ट केले आहे की, अशी बेकायदेशीर विक्री थांबवण्यासाठी आणि शेतकऱ्यांना योग्य दरात गुणवत्तापूर्ण खते उपलब्ध होण्यासाठी ते कठोर कायदेशीर पावले उचलत आहेत. कोणत्याही प्रकारची अनधिकृत विक्री दिसल्यास शेतकऱ्यांनी त्वरित ‘इफ्को’च्या अधिकृत कार्यालयात संपर्क साधावा, असेही आवाहन करण्यात आले आहे.