Agriculture Land : घरबसल्या ऑनलाईन शेतजमिनीचा नकाशा कसा पाहायचा ?

Agriculture Land : शेतजमिनीच्या हद्दींची निश्चिती करणे, नवीन रस्त्यासाठी योग्य मार्ग शोधणे किंवा मालकी हक्क तपासणे यासाठी जमिनीचा नकाशा अत्यंत महत्त्वाचा ठरतो. पूर्वी हा नकाशा मिळवण्यासाठी सरकारी कार्यालयांत फेऱ्या माराव्या लागायच्या, पण आता सरकारने महाभू-नकाशा पोर्टल (Mahabhunakasha) सुरू करून हा नकाशा ऑनलाईन उपलब्ध करून दिला आहे. यामुळे शेतकरी आणि जमीनमालक घरबसल्या सहज नकाशा पाहू शकतात, प्लॉट क्रमांकाने शोधू शकतात आणि तो डाउनलोडही करू शकतात. या लेखात आपण ऑनलाईन जमिनीचा नकाशा कसा पाहायचा आणि तो वाचायचा? हे संपूर्ण माहिती सोप्या भाषेत समजून घेणार आहोत.

जमिनीच्या नकाशाचे महत्त्व

शेतकऱ्यांसाठी जमिनीचा नकाशा असणे अत्यंत महत्त्वाचे आहे. नवीन रस्ता काढायचा असो किंवा जमिनीच्या सीमांची निश्चिती करायची असो, नकाशा आवश्यक ठरतो. पूर्वी हा नकाशा काढण्यासाठी सरकारी कार्यालयांमध्ये जावे लागायचे, पण आता तो ऑनलाईन सहज उपलब्ध आहे.

ऑनलाईन नकाशा पाहण्याची प्रक्रिया

शेतजमिनीचा नकाशा पाहण्यासाठी mahabhunakasha.mahabhumi.gov.in या अधिकृत वेबसाइटला भेट द्या. पेज उघडल्यानंतर Location या पर्यायावर क्लिक करा आणि राज्य, जिल्हा, तालुका आणि गाव निवडा. त्यानंतर Village Map पर्यायावर क्लिक करा आणि गावाचा नकाशा पाहा.

प्लॉट क्रमांकाने नकाशा शोधा

तुमच्या सातबारा उताऱ्यावर दिलेल्या गट क्रमांकाचा वापर करून जमिनीचा संपूर्ण नकाशा पाहता येतो. Search by Plot Number पर्याय वापरून गट क्रमांक टाका आणि संबंधित प्लॉटचा नकाशा स्क्रीनवर उघडेल.

मालकी हक्क आणि क्षेत्रफळ तपासा

Plot Info वर क्लिक केल्यास संबंधित जमिनीच्या मालकाचे नाव आणि एकूण क्षेत्रफळ दिसेल. यामुळे जमीन कोणाच्या नावावर आहे आणि ती किती मोठी आहे, हे सहज समजू शकते.

नकाशा डाउनलोड करण्याची सुविधा

जर तुम्हाला जमिनीचा नकाशा प्रिंट करून ठेवायचा असेल, तर Map Report वर क्लिक करून तो PDF स्वरूपात डाउनलोड करता येईल.

ई-नकाशा प्रकल्प म्हणजे काय?

1880 पासून शासकीय नोंदींमध्ये जमिनीचे नकाशे उपलब्ध आहेत, पण ते जुनाट झाले होते. त्यामुळे सरकारने ई-नकाशा प्रकल्प सुरू केला आहे, ज्याद्वारे जमिनीचे सर्व नकाशे डिजिटल स्वरूपात उपलब्ध करून दिले जात आहेत.